ఆంధ్రభారతి - గీతగోవిందం - జయదేవ - అష్టపది - అష్టపదులు

షష్ఠః సర్గః - సోత్కంఠ వైకుంఠః
అథ తాం గంతుమశక్తాం చిరమనురక్తాం లతా గృహే దృష్ట్వా । తచ్చరితం గోవిందే మనసిజ మందే సఖీ ప్రాహ ॥	1

॥ ప్రబంధః - 12 ॥ (ధన్య వైకుంఠ కుంకుమమ్‌) (గుండక్రియా - రూపక) (శంకరాభరణ - ) గుణకరీ రాగేన రూపక తాళేన గీయతే ।
పశ్యతి దిశి దిశి రహసి భవంతం । తదధర మధుర మధూని పిబంతమ్‌ ॥ నాథ! హరే! జగన్నాథ! హరే! సీదతి రాధా వాస గృహే ॥ (ధ్రువమ్‌) ॥
త్వదభిసరణ రభసేన వలంతీ । పతతి పదాని కియంతీ చలంతీ ॥
విహిత విశద బిస కిసలయ వలయా । జీవతి పరమిహ తవ రతి కలయా ॥
ముహురవలోకిత మండన లీలా । మధురిపు రహమితి భావన శీలా ॥
త్వరితముపైతి న కథమభిసారం । హరిరితి వదతి సఖీమనువారమ్‌ ॥
శ్లిష్యతి చుంబతి జల ధర కల్పం । హరిరుపగత ఇతి తిమిరమనల్పమ్‌ ॥
భవతి విలంబిని విగళిత లజ్జా । విలపతి రోదితి వాసక సజ్జా ॥
శ్రీ జయదేవ కవే రిదముదితం । రసిక జనం తనుతా మతిముదితమ్‌ ॥

విపుల పులక పాళిః స్ఫీత సీత్కారమంత ర్జనిత జడిమ కాకు వ్యాకులం వ్యాహరంతీ । తవ కితవ విధత్తేఽమంద కందర్ప చింతాం రస జల నిధి మగ్నా ధ్యాన లగ్నా మృగాక్షీ ॥	2
అంగేష్వాభరణం కరోతి బహుశః పత్రేఽపి సంచారిణీ ప్రాప్తం త్వాం పరిశంకతే వితనుతే శయ్యాం చిరం ధ్యాయతి । ఇత్యాకల్ప వికల్ప తల్పరచనాసంకల్ప లీలా శత వ్యాసక్తాఽపి వినా త్వయా వర తనుర్నైషా నిశాం నేష్యతి ॥	3
కిం విశ్రామ్యసి కృష్ణభోగిభవనే భాండీరభూమీరుహిః భ్రాతః! యాహి న దృష్టి గోచరమితః సానంద నందాస్పదం । రాధాయా వచనం తదధ్వగ ముఖాన్నందాంతికే గోపతో గోవిందస్య జయంతి సాయమతిథి ప్రాశస్త్య గర్భా గిరః ॥	4

ఇతి శ్రీ జయదేవకృతౌ గీతగోవిందే సోత్కంఠ వైకుంఠః నామో షష్ఠస్సర్గః ॥