ఆంధ్రభారతి - గీతగోవిందం - జయదేవ - అష్టపది - అష్టపదులు

నవమః సర్గః - ముగ్ధ ముకుందః
తా మథ మన్మథ ఖిన్నాం రతి రభస భిన్నాం విషాద సంపన్నాం అనుచింతిత హరి చరితాం కలహాంతరిత మువాచ రహసి సఖీ ॥	1

॥ ప్రబంధః - 18 ॥ (అమందముకుందః) (యదుకులకాంభోజి - ఆది) (రామకరీ -) (ఘూర్జరీ - యతి) ఘూర్జరీ రాగ యతి తాళాభ్యాం గీయతే ।
హరిరభిసరతి వహతి మధు పవనే । కిమపరమధిక సుఖం సఖి! భవనే ॥ మాధవే మా కురు మానిని! మానమయే ॥ (ధ్రువమ్‌) ॥
తాళ ఫలాదపి గురుమతిసరసం । కిము విఫలీ కురుషే కుచ కలశమ్‌ ॥
కతి న కథితమిద మనుపద మచిరం । మా పరిహర హరిమతిశయ రుచిరమ్‌ ॥
కిమితి విషీదసి రోదిషి వికలా । విహసతి యువతి సభా తవ సకలా ॥
మృదు నళినీదళ శీతల శయనే । హరిమవలోకయ సఫలయ నయనే ॥
జనయసి మనసి కిమితి గురు ఖేదం । శృణు మమ వచన మనీహిత భేదమ్‌ ॥
హరిరుపయాతు వదతు బహు మధురం । కిమితి కరోషి హృదయమతివిధురమ్‌ ॥
శ్రీ జయదేవ భణిత మతిలలితం । సుఖయతు రసిక జనం హరి చరితమ్‌ ॥

స్నిగ్ధే యత్పరుషాఽసి యత్ప్రణమతి స్తబ్ధాఽసి యద్రాగిణి ద్వేషస్థాఽసి యదున్ముఖే విముఖతాం యాతాఽసి తస్మిన్ప్రియే । తద్యుక్తం విపరీత కారిణి తవ శ్రీ ఖండ చర్చా విషం శీతాంశుస్తపనో హిమం హుతవహః క్రీడా ముదో యాతనాః ॥	2
సాంద్రానంద పురందరాది దివిషద్బృందై రమందాదరాత్‌ ఆనమ్రైర్మకుటేంద్ర నీల మణిభిః సందర్శితేందిందిరం । స్వచ్ఛందం మకరంద సుందర మిళన్మందాకినీ మేదురం శ్రీ గోవింద పదారవిందమశుభ స్కందాయ వందామహే ॥	3

ఇతి శ్రీ జయదేవకృతౌ గీతగోవిందే కలహాంతరితావర్ణనే ముగ్ధ ముకుందో నామ నవమ సర్గః॥