ఆంధ్రభారతి - గీతగోవిందం - జయదేవ - అష్టపది - అష్టపదులు

దశమః సర్గః - చతుర చతుర్భుజః
అత్రాంతరే మసృణ రోష వశాదసీమ నిఃశ్వాస నిఃసహ ముఖీం సుముఖీముపేత్య । సవ్రీడమీక్షిత సఖీ వదనాం దినాంతే సానంద గద్గద పదం హరిరిత్యువాచ ॥	1

॥ ప్రబంధః - 19 ॥ (చతురచతుర్భుజ రాగరాజి చంద్రోద్యోతః) (దేశవరాళి - మధ్యమాది) (ముఖారి - జంపె) దేశవరాళీ రాగాష్టతాళీ తాళాభ్యాం గీయతే ।
వదసి యది కించిదపి దంత రుచి కౌముదీ హరతి దర తిమిరమతిఘోరం । స్ఫురదధర శీధవే తవ వదన చంద్రమా రోచయతు లోచన చకోరమ్‌ ॥
ప్రియే! చారు శీలే! ప్రియే! చారు శీలే! ముంచ మయి మానమనిదానం । సపది మదనానలో దహతి మమ మానసం దేహి ముఖ కమల మధు పానమ్‌ ॥ (ధ్రువమ్‌) ॥
సత్యమేవాసి యది సుదతి! మయి కోపినీ దేహి ఖర నఖర శర ఘాతం । ఘటయ భుజ బంధనం జనయ రద ఖండనం యేన వా భవతి సుఖ జాతమ్‌ ॥
త్వమసి మమ భూషణం త్వమసి మమ జీవనం త్వమసి మమ భవ జలధి రత్నం । భవతు భవతీహ మయి సతతమనురోధినీ తత్ర మమ హృదయ మతియత్నమ్‌ ॥
నీల నళినాభమపి తన్వి! తవ లోచనం ధారయతి కోక నద రూపం । కుసుమ శర బాణ భావేన యది రంజయసి కృష్ణ మిదమేత దనురూపమ్‌ ॥
స్ఫురతు కుచ కుంభయోరుపరి మణి మంజరీ రంజయతు తవ హృదయ దేశం । రసతు రశనాఽపి తవ ఘన జఘన మండలే ఘోషయతు మన్మథ నిదేశమ్‌ ॥
స్థల కమల గంజనం మమ హృదయ రంజనం జనిత రతి రంగ పరభాగం । భణ మసృణ వాణి! కరవాణి చరణ ద్వయం సరస లసదలక్తక రాగమ్‌ ॥
స్మర గరళ ఖండనం మమ శిరసి మండనం దేహి పద పల్లవముదారం । జ్వలతి మయి దారుణో మదన కదనానలో హరతు తదుపాహిత వికారమ్‌ ॥
ఇతి చటుల చాటు పటు చారు ముర వైరిణో రాధికామధి వచన జాతం । జయతి జయదేవ కవి భారతీ భూషితం మానినీ జన జనిత శాతమ్‌ ॥

పరిహర కృతాతంకే! శంకాం త్వయా సతతం ఘన స్తన జఘనయాఽఽక్రాంతే స్వాంతే పరానవకాశినీ । విశతి వితనోరన్యో ధన్యో న కోఽపి మమాంతరం ప్రణయిని! పరీరంభారంభే విధేహి విధేయతామ్‌ ॥	2
ముగ్ధే! విధేహి మయి నిర్దయ దంత దంశం దోర్వల్లి బంధ నిబిడ స్తన పీడనాని । చండి! త్వమేవ ముదముద్వహ పంచ బాణ చాండాల కాండ దళనా దసవః ప్రయాంతి ॥	3
శశిముఖి! తవ భాతి భంగుర భ్రూః యువ జన మోహ కరాళకాళసర్పీ । తదుదిత భయ భంజనాయ యూనాం త్వదధర శీధు సుధైవ సిద్ధ మంత్రః ॥	4
వ్యథయతి వృథా మౌనం తన్వి! ప్రపంచయ పంచమం తరుణి! మధురాలాపైస్తాపం వినోదయ దృష్టిభిః । సుముఖి! విముఖీ భావం తావద్విముంచ న ముంచ మాం స్వయమతిశయ స్నిగ్ధో ముగ్ధే! ప్రియోఽయ ముపస్థితః ॥	5
బంధూక ద్యుతి బాంధవోఽయమధరః స్నిగ్ధో మధూక చ్ఛవిః గండశ్చండి! చకాస్తి నీల నళిన శ్రీ మోచనం లోచనం । నాసాఽత్యేతి తిల ప్రసూన పదవీం కుందాభదంతి! ప్రియే! ప్రాయ స్త్వన్ముఖ సేవయా విజయతే విశ్వం స పుష్పాయుధః ॥	6
దృశౌ తవ మదాలసే వదనమిందు సందీపనం గతిర్జన మనోరమా విధుత రంభ మూరుద్వయం । రతిస్తవ కలావతీ రుచిర చిత్రలేఖే భ్రువౌ అహో! విబుధ యౌవతం వహసి తన్వి! పృథ్వీ గతా ॥	7
స ప్రీతిం తనుతాం హరిః కువలయాపీడేన సార్ధం రణే రాధా పీన పయోధర స్మరణ కృత్కుంభేన సంభేదవాన్‌ । యత్ర స్విద్యతి మీలతి క్షణమపి క్షిప్రం తదాలోకన వ్యామోహేన జితం జితం జితమభూత్కంసస్య కోలాహలః ॥	8

ఇతి శ్రీ జయదేవకృతౌ గీతగోవిందే చతురచతుర్భుజో నామ దశమస్సర్గః॥