ఆంధ్రభారతి - గీతగోవిందం - జయదేవ - అష్టపది - అష్టపదులు

ఏకాదశః సర్గః - సానంద దామోదరః
సుచిరమనునయేన ప్రీణయిత్వా మృగాక్షీం గతవతి కృతవేశే కేశవే కుంజశయ్యాం । రచిత రుచిర భూషాం దృష్టి మోషే ప్రదోషే స్ఫురతి నిరవసాదం కాఽపి రాధాం జగాద ॥	1

॥ ప్రబంధః - 20 ॥ (శ్రీహరితాళరాజి జలధరవిలసితః) (మోహన - ఆది) (కళ్యాణి - చాపు) వసంత రాగ యతి తాళాభ్యాం గీయతే ।
విరచిత చాటు వచన రచనం చరణే రచిత ప్రణిపాతం । సంప్రతి మంజుళ వంజుళ సీమని కేళిశయన మనుయాతం ॥ ముగ్ధే! మధు మథన మనుగత మనుసర రాధికే ॥ (ధ్రువమ్‌) ॥
ఘన జఘన స్తన భార భరే దర మంథర చరణ విహారం । ముఖరిత మణి మంజీరముపైహి విధేహి మరాళ వికారమ్‌ ॥
శృణు రమణీయతరం తరుణీ జన మోహన మధురిపు రావం । కుసుమ శరాసన శాసన వందిని పిక నికరే భజ భావమ్‌ ॥
అనిల తరళ కిసలయ నికరేణ కరేణ లతా నికురుంబం । ప్రేరణమివ కరభోరు కరోతి గతిం ప్రతి ముంచ విలంబమ్‌ ॥
స్ఫురితమనంగ తరంగ వశాదివ సూచిత హరి పరిరంభం । పృచ్ఛ మనోహర హార విమల జల ధారమముం కుచ కుంభమ్‌ ॥
అధిగతమఖిల సఖీభిరిదం తవ వపురపి రతి రణ సజ్జం । చండి! రణిత రశనా రవ డిండిమ మభిసర సరస మలజ్జమ్‌ ॥
స్మర శర సుభగ నఖేన సఖీమవలంబ్య కరేణ సలీలం । చల వలయ క్వణితై రవబోధయ హరిమపి నిగదిత శీలం ॥
శ్రీ జయదేవ భణిత మధరీకృత హారముదాసిత వామం । హరి వినిహిత మనసా మధితిష్ఠతు కంఠతటీ మవిరామమ్‌ ॥

అక్ష్ణోర్నిక్షిపదంజనం శ్రవణయోస్తాపింఛ గుచ్ఛావలీం మూర్ధ్ని శ్యామ సరోజ దామ కుచయోః కస్తూరికా పత్రకం । ధూర్తానామభిసర సంభ్రమ జుషాం విష్వఙ్నికుంజే సఖి! ధ్వాంతం నీల నిచోళ చారు సుదృశాం ప్రత్యంగ మాలింగతి ॥	2
కాశ్మీర గౌర వపుషా మభిసారికాణాం ఆబద్ధ రేఖమభితో రుచి మంజరీభిః । ఏతత్తమాల దళ నీలతమం తమిస్రం తత్ప్రేమ హేమ నికషోపలతాం తనోతి ॥	3
హారావళీ తరళ కాంచన కాంచి దామ కేయూర కంకణ మణి ద్యుతి దీపితస్య । ద్వారే నికుంజ నిలయస్య హరిం నిరీక్ష్య వ్రీడావతీ మథ సఖీ మియ మిత్యువాచ ॥	4

॥ ప్రబంధః - 21 ॥ (సానందదామోదర ప్రేమద్రుమపల్లవః) (బంగాళవరాళి - రూపక) (ఘంటా - జంపె) వరాళీ రాగ రూపక తాళాభ్యాం గీయతే ।
మంజుతర కుంజ తల కేళి సదనే । ఇహ విలస రతి రభస హసిత వదనే ॥ ప్రవిశ రాధే! మాధవ సమీపమిహ కురు మురారే! మంగళశతాని ॥ (ధ్రువమ్‌) ॥
నవ లసదశోక దళ శయన సారే । ఇహ విలస కుచ కలశ తరళ హారే ॥
కుసుమ చయ రచిత శుచి వాస గేహే । ఇహ విలస కుసుమ సుకుమార దేహే ॥
మృదు చల మలయ పవన సురభి శీతే । ఇహ విలస మదన శర నికర భీతే ॥
వితత బహువల్లి నవ పల్లవ ఘనే । ఇహ విలస పీనకుచ కుంభ జఘనే ॥
మధు ముదిత మధుప కుల కలిత రావే । ఇహ విలస కుసుమశర సరస భావే ॥
మధురతర పిక నికర నినద ముఖరే । ఇహ విలస దశన రుచి రుచిర శిఖరే ॥
విహిత పద్మావతి సుఖ సమాజే । భణతి జయదేవ కవి రాజ రాజే ॥

త్వాం చిత్తేన చిరం వహన్నయమతి శ్రాంతో భృశం తాపితః
కందర్పేణ చ పాతుమిచ్ఛతి సుధా సంబాధ బింబాధరం ।
అస్యాంకం తదలంకురు క్షణమిహ భ్రూ క్షేప లక్ష్మీ లవ
క్రీతే దాస ఇవోపసేవిత పదాంభోజే కుతః సంభ్రమః ॥

సా ససాధ్వస సానందం గోవిందే లోల లోచనా ।
శింజాన మంజు మంజీరం ప్రవివేశ నివేశనమ్‌ ॥

॥ ప్రబంధః - 22 ॥ (సానందగోవింద రాగశ్రేణి కుసుమాభరణః) (మాళవ - ఆది) (మధ్యమావతి - ఆది) వరాళీ రాగ యతి తాళాభ్యాం గీయతే ।
రాధా వదన విలోకన వికసిత వివిధ వికార విభంగం । జల నిధిమివ విధు మండల దర్శన తరళిత తుంగ తరంగమ్‌ ॥ హరిమేక రసం చిరమభిలషిత విలాసం । సా దదర్శ గురు హర్ష వశంవద వదనమనంగ నివాసమ్‌ ॥ (ధ్రువమ్‌) ॥
హారమమలతర తారమురసి దధతం పరిలంబ్య విదూరం । స్ఫుటతర ఫేన కదంబ కరంబితమివ యమునా జల పూరమ్‌ ॥
శ్యామళ మృదుళ కళేబర మండలమధిగత గౌర దుకూలం । నీల నళినమివ పీత పరాగ పటల భర వలయిత మూలమ్‌ ॥
తరళ దృగంచల చలన మనోహర వదన జనిత రతి రాగం । స్ఫుట కమలోదర ఖేలిత ఖంజన యుగమివ శరది తడాగమ్‌ ॥
వదన కమల పరిశీలన మిళిత మిహిర సమ కుండల శోభం । స్మిత రుచి రుచిర సముల్లసితాధర పల్లవ కృత రతి లోభమ్‌ ॥
శశి కిరణ చ్ఛురితోదర జలధర సుందర సకుసుమ కేశం । తిమిరోదిత విధు మండల నిర్మల మలయజ తిలక నివేశమ్‌ ॥
విపుల పులక భర దంతురితం రతి కేళి కలాభిరధీరం । మణి గణ కిరణ సమూహ సముజ్జ్వల భూషణ సుభగ శరీరమ్‌ ॥
శ్రీ జయదేవ భణిత విభవ ద్విగుణీకృత భూషణ భారం । ప్రణమత హృది వినిధాయ హరిం సుచిరం సుకృతోదయ సారమ్‌ ॥

అతిక్రమ్యాపాంగం శ్రవణ పథ పర్యంత గమన ప్రయాసేనేవాక్ష్ణో స్తరళతర భావం గమితయోః । ఇదానీం రాధాయాః ప్రియతమ సమాలోక సమయే పపాత స్వేదాంబు ప్రసర ఇవ హర్షాశ్రు నికరః ॥	7
భజంత్యా స్తల్పాంతం కృత కపట కండూతి పిహిత స్మితం యాతే గేహాద్బహిరవహితాళీ పరిజనే । ప్రియాస్యం పశ్యంత్యాః స్మర పరవశాకూత సుభగం సలజ్జా లజ్జాఽపి వ్యగమదివ దూరం మృగదృశః ॥	8
సానందం నంద సూనుర్దిశతు పరతరం సమ్మదం మంద మందం రాధామాధాయ బాహ్వోర్వివరమను దృఢం పీడయన్ప్రీతి యోగాత్‌ । తుంగౌ తస్యా ఉరోజావతను వరతనోర్నిర్గతౌ మా స్మ భూతాం పృష్ఠం నిర్భిద్య తస్మాద్బహిరితి వలిత గ్రీవమాలోకయన్వః ॥	9
జయ శ్రీ విన్యస్తైర్మహిత ఇవ మందార కుసుమైః స్వయం సిందూరేణ ద్విప రణ ముదా ముద్రిత ఇవ । భుజాపీడ క్రీడా హత కువలయాపీడ కరిణః ప్రకీర్ణాసృగ్బిందుర్జయతి భుజ దండో మురజితః ॥	10
సౌందర్యైకనిధే రనంగ లలనా లావణ్య లీలా జుషో రాధాయా హృది పల్వలే మనసిజ క్రీడైక రంగ స్థలే । రమ్యోరోజ సరోజ ఖేలన రసిత్వాదాత్మనః ఖ్యాపయన్‌ ధ్యాతుర్మానస రాజ హంస నిభతాం దేయాన్ముకుందో ముదమ్‌ ॥	11

ఇతి శ్రీజయదేవకృతౌ గీతగోవిందే రాధికామిలనే సానందదామోదరోనామ ఏకాదశస్సర్గః॥