ఆంధ్రభారతి - గీతగోవిందం - జయదేవ - అష్టపది - అష్టపదులు - గీతగోవిందము

Home

కీర్తనలు

జయదేవ

గీతగోవిందం

ద్వాదశః సర్గః - సుప్రీత పీతాంబరః

గతవతి సఖీ బృందేఽమంద త్రపాభర నిర్భర
స్మర పరవశాకూత స్ఫీత స్మిత స్నపితాధరం ।
సరస మనసం దృష్ట్వా రాధాం ముహుర్నవ పల్లవ
ప్రసవ శయనే నిక్షిప్తాక్షీమువాచ హరిః ప్రియామ్‌ ॥

1

॥ ప్రబంధః - 23 ॥ (మధురిపు విద్యాధరలీలః) (విభాస - ఆది) (నాదనామక్రియ -) విభాస రాగైకతాళీ తాళాభ్యాం గీయతే ।
కిసలయశయన తలే కురు కామిని! చరణ నళిన వినివేశం । తవ పద పల్లవ వైరి పరాభవమిదమనుభవతు సువేశమ్‌ ॥ క్షణ మధునా నారాయణ మనుగత మనుసర రాధికే ॥ (ధ్రువమ్‌) ॥
కర కమలేన కరోమి చరణమహ మాగమితాఽసి విదూరం । క్షణముపకురు శయనోపరి మామివ నూపురమనుగతి శూరమ్‌ ॥
వదన సుధా నిధి గళితమమృతమివ రచయ వచనమనుకూలం । విరహమివాపనయామి పయోధర రోధకమురసి దుకూలమ్‌ ॥
ప్రియ పరిరంభణ రభస వలితమివ పులకిత మతిదురవాపం । మదురసి కుచ కలశం వినివేశయ శోషయ మనసిజ తాపమ్‌ ॥
అధర సుధా రసముపనయ భామిని! జీవయ మృతమివ దాసం । త్వయి వినిహిత మనసం విరహానల దగ్ధ వపుషమవిలాసమ్‌ ॥
శశిముఖి! ముఖరయ మణి రశనా గుణమనుగుణ కంఠ నినాదం । శ్రుతి యుగళే పిక రుత వికలే మమ శమయ చిరాదవసాదమ్‌ ॥
మామతివిఫల రుషా వికలీకృత మవలోకితు మధు నేదం । లజ్జితమివ నయనం తవ విరమతి విసృజ వృథా రతి ఖేదమ్‌ ॥
శ్రీ జయదేవ భణితమిద మనుపద నిగదిత మధురిపు మోదం । జనయతు రసిక జనేషు మనోరమ రతి రస భావ వినోదమ్‌ ॥

(సురతారంభ చంద్రహాసః) ప్రత్యూహః పులకాంకురేణ నిబిడాశ్లేషే నిమేషేణ చ క్రీడాకూత విలోకితేఽధర సుధాపానే కథానర్మభిః । ఆనందాధిగమేన మన్మథ కలా యుద్ధేఽపి యస్మిన్నభూత్‌ ఉద్భూతః స తయోర్బభూవ సురతారంభః ప్రియంభావుకః ॥	2
(కామతృప్త కామినీహాసః) దోర్భ్యాం సంయమితః పయోధర భరేణాపీడితః పాణిజై రావిద్ధో దశనైః క్షతాధర పుటః శ్రోణీ తటేనాహతః । హస్తేనానమితః కచేఽధర మధు స్యందేన సమ్మోహితః కాంతః కామపి తృప్తిమాప తదహో! కామస్య వామా గతిః ॥	3
(పౌరుషరస ప్రేమవిలాసః) మారాంకే రతి కేళి సంకుల రణారంభే తయా సాహస ప్రాయం కాంత జయాయ కించిదుపరి ప్రారంభి యత్సంభ్రమాత్‌ । నిష్పందా జఘన స్థలీ శిథిలితా దోర్వల్లిరుత్కంపితం వక్షో మీలితమక్షి పౌరుష రసః స్త్రీణాం కుతః సిధ్యతి ॥	4
(కామాద్భుతాభినవ మృగాంకలేఖనః) తస్యాః పాటల పాణిజాంకితమురో నిద్రా కషాయే దృశౌ నిర్ధౌతోఽధర శోణిమా విలుళితాః స్రస్తాః స్రజో మూర్ధజాః । కాంచీదామ దర శ్లథాంచలమితి ప్రాతర్నిఖాతైర్దృశో రేభిః కామశరై స్తదద్భుత మభూత్పత్యుర్మనః కీలితమ్‌ ॥	5
వ్యాలోలః కేశ పాశస్తరళితమలకైః స్వేద మోక్షౌ కపోలౌ క్లిష్టా బింబాధర శ్రీః కుచ కలశ రుచా హారితా హార యష్టిః । కాంచీ కాంతిర్హతాశా స్తన జఘన పదం పాణినాచ్ఛాద్య సద్యః పశ్యంతీ సత్రపా సా తదపి విలుళితా ముగ్ధ కాంతిర్ధినోతి ॥	6
ఈషన్మీలిత దృష్టి ముగ్ధ విలసత్సీత్కార ధారా వశాత్‌ అవ్యక్తాకుల కేళి కాకు వికసద్దంతాంశు ధౌతాధరం । శాంత స్తబ్ధ పయోధరం భృశ పరిష్వంగాత్కురంగీ దృశో హర్షోత్కర్ష విముక్త నిఃసహ తనోర్ధన్యో ధయత్యాననమ్‌ ॥	7
అథ సహసా సుప్రీతం సురతాంతే సా నితాంత ఖిన్నాంగీ । రాధా జగాద సాదర మిద మానందేన గోవిందమ్‌ ॥	8

॥ ప్రబంధః - 24 ॥ (సుప్రీతపీతాంబర తాళశ్రేణీ) రామక్రియా రాగ యతి తాళాభ్యాం గీయతే ।
కురు యదు నందన! చందన శిశిరతరేణ కరేణ పయోధరే । మృగమద పత్రకమత్ర మనో భవ మంగళ కలశ సహోదరే ॥ నిజగాద సా యదు నందనే క్రీడతి హృదయ నందనే ॥ (ధ్రువమ్‌) ॥
అళికుల గంజనమంజనకం రతి నాయక సాయక మోచనే । త్వదధర చుంబన లంబిత కజ్జల ఉజ్జ్వలయ ప్రియ లోచనే ॥
నయన కురంగ తరంగ వికాస నిరాస కరే శ్రుతి మండలే । మనసిజ పాశ విలాస ధరే శుభ వేశ నివేశయ కుండలే ॥
భ్రమర చయం రచయంతముపరి రుచిరం సుచిరం మమ సమ్ముఖే । జిత కమలే విమలే పరికర్మయ నర్మజనక మళకం ముఖే ॥
మృగమద రస వలితం లలితం కురు తిలకమళిక రజని కరే । విజిత కళంక కళం కమలానన విశ్రమిత శ్రమ శీకరే ॥
మమ రుచిరే చికురే కురు మానద మనసిజ ధ్వజ చామరే । రతి గలితే లలితే కుసుమాని శిఖండి శిఖండక డామరే ॥
సరస ఘనే జఘనే మమ శంబర దారణ వారణ కందరే । మణి రశనా వసనాభరణాని శుభాశయ వాసయ సుందరే ॥
శ్రీ జయదేవ వచసి రుచిరే సదయం హృదయం కురు మండనే । హరి చరణ స్మరణామృత నిర్మిత కలి కలుష జ్వర ఖండనే ॥

రచయ కుచయోః పత్రం చిత్రం కురుష్వ కపోలయోః ఘటయ జఘనే కాంచీం ముగ్ధ స్రజా కబరీ భరం । కలయ వలయ శ్రేణీం పాణౌ పదే మణి నూపురౌ ఇతి నిగదితః ప్రీతః పీతాంబరోఽపి తథాఽకరోత్‌ ॥	9
యద్గాంధర్వ కలాసు కౌశలమనుధ్యానం చ యద్వైష్ణవం యచ్ఛృంగార వివేక తత్త్వ రచనా కావ్యేషు లీలాయితం । తత్సర్వం జయదేవ పండిత కవేః కృష్ణైక తానాత్మనః సానందాః పరిశోధయంతు సుధియః శ్రీ గీత గోవిందతః ॥	10
శ్రీ భోజదేవ ప్రభవస్య రామాదేవీ సుత శ్రీ జయదేవకస్య । పరాశరాది ప్రియ వర్గ కంఠే శ్రీ గీతగోవింద కవిత్వమస్తు ॥	11
సాధ్వీ! మాధ్వీక! చింతా న భవతి భవతః శర్కరే! కర్కశాఽసి ద్రాక్షే! ద్రక్ష్యంతి కే త్వామమృత! మృతమసి క్షీర! నీరం రసస్తే । మాకంద! క్రంద కాంతాధర ధర! న తులాం గచ్ఛ యచ్ఛంతి భావం యావచ్ఛృంగార సారం శుభమివ జయదేవస్య వైదగ్ధ్య వాచః ॥	12
ఇత్థం కేళి తతిర్విహృత్య యమునా కూలే సమం రాధయా తద్రోమావళి మౌక్తికావళి యుగే వేణీ భ్రమం బిభ్రతి । తత్రాహ్లాది కుచ ప్రయాగ ఫలయోర్లిప్సావతోర్హస్తయోః వ్యాపారాః పురుషోత్తమస్య దదతు స్ఫీతాం ముదం సంపదమ్‌ ॥	13

ఇతి శ్రీజయదేవకృతౌ గీతగోవిందే సుప్రీతపీతాంబరో నామ ద్వాదశస్సర్గః॥