ఆంధ్రభారతి - నారాయణ తీర్థ - నారాయణతీర్థ తరంగములు

అష్టమ తరంగం (రాసక్రీడా వర్ణనం)
శ్లో.	అష్టమే గోపికాగీతం ఆదరణాభినీయతే గోపీభిస్సహ కృష్ణస్య రహస్యగమనం వనే॥	1
శ్లో.	అంతర్ధానం చ కృష్ణస్య తతో గోపీప్రలాపనం కృష్ణస్యాన్వేషణం భూయస్తాసాం శ్రీకృష్ణదర్శనం ఏతచ్చరిత్ర మధునా సంగృహితం హరేః కృతమ్‌॥	2
శ్లో.	ఆనందనందయంతం హృదయగతమవిద్యాశ్రయం నాదగమ్యం ప్రాణాదీ\న్‌ షోడశారాన్విత రథచరణస్యార్పితన్నాభిదేశే ఆకాశాదీంశ్చ సర్వాన్నిజపరికలయా జృంభితాన్మాయయా తం గోపీమధ్యేముకుందం వ్రజపురవనితాకాపిగాయత్యుదారమ్‌॥	3

కీర్తన

ఆహిరి - ఆది
పల్లవి:	భావయే సఖి హే
	భావయే సఖి భావదృశ మీశమ్‌॥
అనుపల్లవి:	మధురిపు మిహ రాసభువి విహరంతం
	మాధవ మింద్రియాదిషు వసంతమ్‌॥
చరణ (1):	దినకరమండలగం సుతపంతం
	విశ్వతనుం విషయాదిషు సంతమ్‌॥
చరణ (2):	సకలవిషయ మనుభవతి య దేకం
	యత్ర తదా నిజ మేతి సదా కమ్‌॥
చరణ (3):	పవనగత మఖిలకారణ మాదిం
	ప్రాణతయా పరిపీత మనాదిమ్‌॥
చరణ (4):	య మవధి లయ మనుయాతి తు తారం
	తం పర మవ్యయ మాగమసారమ్‌॥
చరణ (5):	అర మివ రథచరణస్య పినద్ధం
	యత్ర కలానియమేన సుసిద్ధమ్‌॥
చరణ (6):	నిగమవిచారజనిత మతిగమ్యం
	జన్మలయాదివిహిత మతిరమ్యమ్‌॥
చరణ (7):	అభినవజలధరసుందరదేహం
	వారితగోపవధూజనమోహమ్‌॥
చరణ (8):	హరిగురుపరిజనహృదయవినోదం
	నారాయణతీర్థఫణితమిహేదమ్‌॥

08.01

శ్లో.

సర్వప్రత్యంచమేకం ప్రకృతిమఖిలభావం స్వయం భాసయంతం
నిత్యానందస్వభావం సకల హృదయగం వ్యోమవన్నిర్వికారం
ఆచార్యస్య ప్రసాదా ద్విదురిహ మునయో వేదభాగే ముకుందం
నృత్యంతీ గాయతీతి వ్రజపుర వనితా భక్త సంకల్పసిద్ధమ్‌॥

కీర్తన

ముఖారి(వరాళి) - ఆది
పల్లవి:	శ్రీనిలయం సఖి శ్రీనిలయం
	ధీమహి గోపీమానసనిలయమ్‌॥
చరణ (1):	గగనపవనముఖభూతనిధానం
	ప్రియతమ మాగమమృగిత మిహైనమ్‌॥
చరణ (2):	యదభిసృజతి జగ దవతి పునాతి
	గ్రసతి చిదాత్మతయా సువిభాతి॥
చరణ (3):	దివ్యతను మజర మమర మసంగం
	అంతర్భాహ్యతతం జగదంగమ్‌॥
చరణ (4):	అనుకలిత శ్రుతివాచ మధీశం
	దినకరశశధరలోచనదేశమ్‌॥
చరణ (5):	విశ్వహృదయ మవనీపద మాదిం
	ప్రాణతయా పరిపీత మనాదిమ్‌॥
చరణ (6):	విశ్వనగరవరరాజ మరాజం
	వివిధ కలాకృత జీవసమాజమ్‌॥
చరణ (7):	ముహు రపరపరం బృంహితభావం
	నిజకలయాపరిహృతభవభావమ్‌॥
చరణ (8):	వ్రజయువతీజనకృతపరిహాసం
	వనభువి మునివరహృదయనివాసమ్‌॥
చరణ (9):	బుధజనమానసమండనభూతం
	ఇదమిహ నారాయణతీర్థగీతమ్‌॥

08.02

శ్లో.	ఇతిగోప్యః పరానందం గాయంత్యస్తాః పృథక్‌ పృథక్‌ అపరాః శ్రుతయో భూయోభూయస్తత్రైవ సంగతాః॥	5
శ్లో.	కదాచి ద్గోవిందే గతవతి పరానందసదనం నిరాకారం ధామ స్వకమితి చ విజ్ఞాపయతి తాః తదాకారం సాక్షా త్పర మధిగతాః కృష్ణరసికాః పునస్తం గాయంత్యో రహసి మృగయంతి ప్రియతమమ్‌॥	6

కీర్తన

శంకరాభరణం(కాంభోజి) - ఆట
పల్లవి:	మృగయత రాధామాధవం ముహురిహ నిగమవనే ధవమ్‌॥
చరణ (1):	అనుపద మఖిలఫలప్రదశాఖిషు మృగిత మదృష్ట మనంతం
	క్వచిదపి గూఢతయా నిజధామని కృతసుకృతైరనుభూతమ్‌॥
చరణ (2):	యదఖిలదూరతరేపి యదంతిక మాత్మతయా వియదాదిం
	అనుగత మధిగత మామపార మనన్య మనోభి రనాదిమ్‌॥
చరణ (3):	స్వయమవగతిరవగంతృనియంతృయదఖిలజనస్య నిరీహం
	శ్రవణనయనవచనాదిదురాప మపుణ్యవతాతి దురూహమ్‌॥
చరణ (4):	యదనుమనసిపరిధావతిధావతి దూరత యేహ దురంతం
	విభుతర మఖిలజనాంతర బాహ్యమఖండచిదాత్మతయా తమ్‌॥
చరణ (5):	యదఖిలభూతనిదాన మవైతి తదాత్మత యాత్మని సర్వం
	సతరతి శోకమహోదధిమాశు వివర్జితమానుషగర్వమ్‌॥
చరణ (6):	చలతి జగతియదచంచలమాతత ముపవినిహితజగదండం
	ప్రభవతి భవతి పినద్ధ మిదం నిజ మాయికమేక మఖండమ్‌॥
చరణ (7):	అసురధియామతిదుర్గమమప్రియ మాత్మహనో హి పరం తే
	ఇతి నిగమా జగు రేవ మపార సుఖైకరసం న భజంతే॥
చరణ (8):	కువలయదళరుచిరాకృతి మన్య మనోభిరుపాహృతదేహం
	గురుకృపయాహృతగోపవధూజనశోక మపాకృతమోహమ్‌॥
చరణ (9):	శ్రుతిశిరసామనుభూషణమద్వయమాత్మరతిప్రియశేషం
	పురరిపుభావరసిక వరనారాయణతీర్థఫణిత మదోషమ్‌॥

08.03

శ్లో.	ఇత్థం గోపీజనా శ్శౌరేః పరభావవిదః పునః భువి శిక్షాం వితన్వంత్యో మృగయంత్యాది కారణమ్‌॥	7
శ్లో.	సర్వాంతఃకరణాంతస్థం మాధవం ప్రాణవల్లభం మృగయంతీ ర్వనే పుష్పైః హసంత ఇవ పాదపాః॥	8
శ్లో.	మల్లికాదిలతాస్తద్వదోషధ్యోఽన్యాశ్చ తద్వనే సంబోధ్య నామభిస్తేషాం తానాహుర్వల్లవాంగనాః॥	9

కీర్తన

కాంభోజి(భైరవి) - ఆది
పల్లవి:	మాధవం దర్శయ హే మందార -- మాధవవం దర్శయ॥
అనుపల్లవి:	మాధవమిహ రాధికారాధిత మథ సాధకజన ఫలసాధకమధునా॥
చరణ (1):	రే రే మందారసంతానకల్పక పారిజాతచందన
	రే రే చంపకనాగపున్నాగశ్రీ పూగపనసనారికేళరసాల॥
చరణ (2):	సరసకదంబకపలాశ కురవకవటసమూహ
	విలసదశోకకపిత్థకదళీవన లలితదేవదారుబృందపిచుమంద॥
చరణ (3):	బృందేబృందావనచర మహర్నిశి నందనందన మతులం
	కుందలవంగలతే కుటిలాలక మిందుసుందరాననమీశమతిబలమ్‌॥
చరణ (4):	ఫుల్లకుసుమమల్లికే జాజి మాలతీవల్లివనజలతికే
	కల్లోలశ్రీకమలకేతకీ కుముదకల్హారాదికుసుమచయ పంక్తిలలితే॥
చరణ (5):	శుకకోకిలశారికాబృంద శకుంత శోభనహంసకుల
	ప్రకటాకాశానిలానలజలధరణి సకలదేవగణ సరసగుణగణ॥
చరణ (6):	సకలనిగమగూఢ మఖిలలోకాధారమచ్యుత మఖిలగురుం
	సరసగోపీగణపరిగీతమనుశివ నారాయణతీర్థఫణిత ముదారమ్‌॥

08.04

శ్లో.	గోపీషు మృగయంతీషు వనే గోపాలనందనం ఆత్మానం దర్శయామాస చికీర్షుర్భూర్యసుగ్రహమ్‌॥	10
గద్య.	అథ ఖలు వల్లవ యువత్యో నిజవల్లభ విరహ సంతాప దురంతచింతా సంతాప మందీకృత బాహ్య విషయ వివేక వృత్తిమచ్చిత్తవత్యో ముహుర్ముహు స్తదీయ లీలావినోద నవరసావిష్కరణ ప్రవీణాః గోపాంగ ప్రత్యంగ గుణగణసమవిషమబలాబల సమబల విలాసవిలసిత గ్రీవాశిరఃకంప ప్రతిభంగీ లలిత దివ్య గాత్ర భ్రూనేత్ర హస్తవిశేషాద్యావిష్కృత నవరసాలంకారాలంకృత వివిధ లాస్యవిశేషం స్ఫురదధరమణిపరిమిళిత మురళీ కలరవ సుధావధీరిత సురసుధాఖండమండలం స్మారంస్మారం స్వస్వాంతఃకరణానపాయేన సర్వాంతరంగం మదన శతకోటి సుందరాంగం ధ్యాయంత్యో మనసా ప్రణమంత్యః శిరసా వచసా చ పురఃస్థిత మివ సంబోధ్య ప్రత్యేకం గోపాలమగాయంత।	11
శ్లో.	మదనశతకోటివేషం మాధవ మాధాయ మామకే మనసి విదళితసురరిపుబృందం విష్ణుం గాయామి విశ్వభర్తారమ్‌॥	12

కీర్తన

సౌరాష్ట్ర(మోహన) - ఆది
పల్లవి:	నందనందన గోపాల జయ	నవనీతచోరగోపాల॥
చరణ (1):	కందర్పశతకోటిసుందర సుఖకర	మందహాస శ్రీగోపాల॥
చరణ (2):	బృందావనగోబృందఘనానంద	చంద్రానన శ్రీగోపాల॥
చరణ (3):	లీలామానుషబాలకవేష	బలానుజవిగ్రహ గోపాల।
చరణ (4):	మురళీధర మునిబృందవిచింతిత	ముక్తాజనాశ్రయ గోపాల॥
చరణ (5):	నందసునందాదివందితచరణార	విందమహోన్నత గోపాల॥
చరణ (6):	బాధితరిపుబృంద బోధరసానంద	సాధితజగదండ గోపాల॥
చరణ (7):	గోపీమన్మథ గోపరిపాలక	గోవర్ధనోద్ధర గోపాల॥
చరణ (8):	రాసమండలనట దాసజనావన	వాసవాదినుత గోపాల॥
చరణ (9):	మూలకారణమోహవారకలక్ష్మీ	పాల పరాధీశ గోపాల॥
చరణ (10):	ఘోరభవార్ణవతారకపాలిత	నారాయణతీర్థ గోపాల॥

08.05

శ్లో.	మాధవచరణసరోజే వనభువి సికతాసురేఖయాఽనుమితే దృష్ట్వా తదను చ తన్వ్యాశ్చరణౌ కస్యాఇతీతరాః ప్రాహుః॥	13
శ్లో.	కాచి ద్గోపీ కనకలతికాకాంతి రంతాదిహీనం కాంతం స్వాంతఃస్థితమనుగతం కామకామం శ్రయంతీ లక్షీకృత్య శ్రుతి రివ పరానందమూర్తిం ప్రగల్భా నృత్యంతి గాయతీతి ప్రకృతి పరతరంమృగ్యమాణే ముకుందే॥	14

కీర్తన

కేదారగౌళ - ఆది
పల్లవి:	నందముకుందే పరమానందే	వయమిహకిము మృగయామ॥
చరణ (1):	విహరతి గోపే గతభవతాపే	కా మనురతి దురాపే
	క్వచి దపి నీతే హృతనవనీతే	నిజకలయా సువిభాతే॥
చరణ (2):	అమృతకలాయామతివిమలాయా	మచలవిభూతినిదానే
	స్వసుఖరతాయామతితరళాయా	మనుపదమహమనుమానే॥
చరణ (3):	కృతజగదండే సుఖచిదఖండే	సకలజగత్ప్రతిభానే
	శ్రుతిపరిగీతే మహదనుభూతే	నిజసుఖసాధిత మానే॥
చరణ (4):	నభసి సదంశే మనసి చిదంశే	పశ్యతి వితత మశేషం
	ప్రకృతికృతాదింరథతురగాదిం	భానుసదృశకృతవేషమ్‌॥
చరణ (5):	మనసి విలీనే గతవతి మానే	కలయతి రతి మిహ దేవే
	నిజపదగతయా సుకృదభిమతయా	సహగతనిజపరభావే॥
చరణ (6):	అపగతకామే జగదభిరామే	జడజసమస్తవిరామే
	అనుకృతవామే విగళితభీమే	భీతపవనరవిసోమే॥
చరణ (7):	వ్యవహృతిహీనే మహదభిధానే	బోధలయాదిసమానే
	ప్రణవతురీయే శివపదమేయే	నాదలయావధిమానే॥
చరణ (8):	విగతకళంకే పరిహృతశంకే	గళితపరాపరభేదే
	వినిహతశోకే కృతపరిపాకే	గోపవధూజనమోదే॥
చరణ (9):	సదసదతీతం సతతవిభాతం	కేశవపరతరభావం
	అనుపరిగీతం నిగమసమేతం	నారాయణతీర్థేనేదమ్‌॥

08.06

శ్లో.

పాణావాధాయపాణిం వ్రజపుర వనితా కాపికస్యాః ప్రగల్భా
గ్రాహ్యం గృహ్ణం తమంతర్బహిరపి వితతం స్వానుభూతి ప్రసిద్ధం
సిద్ధం వేదాగ్రభాగే తదనుగుణనయైః బ్రహ్మవిత్సుప్రసిద్ధం
నృత్యంతీ గాయతీతి ప్రకృతి పరతరం మానతో దర్శయంతీ॥

కీర్తన

మధ్యమావతి - ఆట
పల్లవి:	దేవదేవం క్వేతి తం	మృగయామ వయ మిహ॥
చరణ (1):	దృశ్యవస్తుషు దృక్తయా	సతతం సతి ప్రతిభాతి
	ప్రత్యగాత్మతయాఽపి బుద్ధిషు	నిత్యమేవ పునాతి వయ మిహ॥
చరణ (2):	ప్రాణబుద్ధిలయోదయా దపి	భాసయ త్యమలేన
	స్వప్రకాశ సుఖాత్మనోదయ	హానిధీరహితేన వయ మిహ॥
చరణ (3):	యేన విశ్వపదాభిధాన	ఇహైకతా మనుయాతి
	తత్ర సర్వసుఖైకరసే	పరాత్మని భాతి వయ మిహ॥
చరణ (4):	చింత్యతే యదచింత్యరూప	తయైవ యోగివరేణ
	సంతతం హృదయాంతరం	సఖిభాతిధీరవరేణ వయ మిహ॥
చరణ (5):	నందయత్యఖిలం జనం	నిజనిత్యబోధసుఖేన
	ఛందసా మఖిలాగ్రభాగవిని	శ్చితేన సమేన వయ మిహ॥
చరణ (6):	పౌరజానపదానుగో రమతే	నృపో హి యథైవ
	ప్రాణబుద్ధ్యనుగస్తనౌవికృతిం	విభాతి వినైవ వయ మిహ॥
చరణ (7):	రాజవత్ఫలమాత్రభోగితయా	తనౌ సువిభాతి
	బాలవద్విగతానురాగతయాఽపి	యోనబిభేతి వయ మిహ॥
చరణ (8):	గోపనీయతయాఽపిగోప	వధూభి రాభి రమాని
	శ్రీమదాత్మకభావభావనయా	స యేవ భవాని వయ మిహ॥
చరణ (9):	వేదభాగవిచారజాతమతి	ప్రియప్రణయేన
	వర్ణితం శివ నారాయణతీర్థ పదాంబుజ	భ్రమరేణ వయ మిహ॥

08.07

శ్లో.

మూర్తామూర్తే యదనువితతే మాయయా యస్య రూపే
సచ్చ త్యచ్చే త్యుభయరస ఇత్యాగమోక్తో య ఆత్మా
నేతి త్యేవం యదవధి జగద్బాధ్యతే యస్య దృష్ట్యా
సర్వోత్కృష్టం తమిహ మృగయంత్యాహ గోపీముకుందమ్‌॥.

కీర్తన

కాంభోజి(హుసేని) - ఆది
పల్లవి:	సహచరి సమరస	మిహ మృగయం తే॥
అనుపల్లవి:	సజ్జనసంగరతా మునయో భువి	నిగమశిరస్సుఖదం తే॥
చరణ (1):	గిరితరుసాగరసరిదపరాత్మతయా	సతి భాతిముకుందం
	సురనరమృగఖగరూపతయాఽపి	విభాతి చిరం సుఖకందమ్‌॥
చరణ (2):	ఇహ మధుమాధవముఖర్తువత్సర	రూపతయాఽపి విభాతి
	దినకర తార నిశాకర పావక భూజల	భావ ముపైతి॥
చరణ (3):	గగన మరుద్వివిధాత్మతయాఽపి	పరాత్మని సర్వదృగంశే
	అహమహమిత్యనుభూతి విశేషణ	భూతతయాఽను భవాంశే॥
చరణ (4):	ఇదమిహదృశ్యమదృశ్యతయాఽఽత్మని	భాసయతి స్వవిభాతే
	అపహతశోకభయే గగనోపమ	దేహతయాఽఖిలభూతే॥
చరణ (5):	జగదుపమర్దిత మాగమభాగ	విచారధియాపునరేతం
	చిరమవివేక సమర్పిత మాత్మని	యత్రజనై రనుభూతమ్‌॥
చరణ (6):	ధన పశు పుత్ర కళత్ర ఫలాని	యదర్థతయా భువిసంతి
	స్వయ మపరోక్షతయా సకలస్య	మహ త్యుపలబ్ధరి భాతి॥
చరణ (7):	సకలజగ న్మధుని స్వయ మవ్యయ	బోధతయా సువిభాతే
	అమృతర్తే జగతి వ్యయ మేతి	సదాత్మతయాఽప్యనుభూతే॥
చరణ (8):	వ్రజయువతీజనవల్లభభావ	ముపేయుషి నవజలదాభే
	నవరసశాలిని శుభవనమాలిని	కామిని కనకలతాభే॥
చరణ (9):	మురరిపుభావరసాభినివేశ	జనాంతరభూషణభూతం
	అధిగతబోధనిదాన మిదం	శివనారాయణయతిగీతమ్‌॥

08.08

శ్లో.	మధుత్వేన చ యత్సిద్ధం భూతభౌతికవర్గయోః సోఽయం సాక్షాత్పరానందం సహచర్యాఽనువర్తతే॥	17
అథ రాధామాధవసంవాదః కథ్యతే।

కీర్తన

మధ్యమావతి(నాదనామక్రియ) - జంపె
రాధా:	కలభగతికలిత ఘన కాలమేఘాభ
	కలయ మమ రహసి కుతుకాని సుబహూని॥
కృష్ణః:	కలహంసగామిని తథైవ కరవాణి
	కథయసి యథా సపది కథయ పర మద్య॥
రాధా:	విమలకల్యాణగుణ వివిధవిశ్వాత్మ\న్‌
	విగళితదుకూలమథ రచయ మమ సుదృఢమ్‌॥
కృష్ణః:	బాఢ మబలే తవ దృఢం విరచయామి
	హాటకదుకూల మాయాహి తరుమూలమ్‌॥
రాధా:	రచయ మృగమదతిలక మతిలలిత మద్య
	కుచకలశయుతమపి సకుంకుమవిలేపమ్‌॥
కృష్ణః:	రచయామి తిలకమపి తవ లలితఫాలే
	కుచకుంభ యుగళేఽపి కుంకుమవిలేపమ్‌॥
రాధా:	గళితకచనిచయ మథ ఘటయ మమకృష్ణ
	గమయ మామిహ రహసి కేశవ కృపాళో॥
కృష్ణః:	ఏహి మమహృదయ కుతుకం కలయరాధే
	ఇహ సముపవిశ రహసి దేహి ముద మద్య॥
రాధా:	కుసుమనిచయాపచయ మద్య కురు కృష్ణ
	కుంతలభరం ఘటయ మమ కుసుమభారైః॥
కృష్ణః:	మమ రమణి కుసుమ భారై రలంకుర్వే
	సుమశరశరాసన సమం తు కచనిచయమ్‌॥
రాధా:	సరసవరగంధి సుర సాలఫలవర్గం
	నిరవధిసుఖం దేహి నియత మపవర్గమ్‌॥
కృష్ణః:	నిరుపమఫలాని చ గృహాణ సరసాని
	నిర్విశంకం విహర మమ హృదయరమణి॥
రాధా:	పానీయ మానీయ తాం త్వయా మహ్యం
	పాతుం పిపాసా హి భూయసీ మమ భో॥
కృష్ణః:	మధురం పయః పిబ మధూని బహూని
	మమ వల్లభే తృప్తి రస్తు తవ సుతరామ్‌॥
రాధా:	అధరసుధయా మమ మనోరథపయోధిం
	అధిక మిహ పూరయ కృపాపారజలధే॥
కృష్ణః:	కలయ వరవర్ణిని తథైవ కలయామి
	మిళతు తవ హృదయం మదీయహృదయేన॥
రాధా:	కథ మనుసరామి వనభూమిషు భవంతం
	కథయ సుభగాఽహ మబలాతీవ కాంతమ్‌॥
కృష్ణః:	అహమిహ వహామి తు రమామి చ సుశీలే
	విహిత సరసాలాప గతమదనతాపే
	ఇతికలిత మిహ రాధికా కృష్ణ చరితం
	రహసి శివనారాయ ణానంద రచితమ్‌॥

08.09

గద్య.

కదాచిదథ బృందావనే శారదచంద్ర చంద్రికా ధవళిత కాళిందీ
పుళిన నళిననాభ చరణ నళినాంక రమణీయభాగే విస్మృత పతి పుత్ర
బాంధవా స్తత్ర గాయం గాయం సంచరంత్యో మధుకరా ఇవ మాధవ
మభిలషంత్యో విలపంత్యశ్చ రహస్యారాధిత మాధవాం రాధాం
క్వాప్యుపకుంజం మాధవ విరహవ్యాకులాంతరతయా చోన్మాదావస్థాయాం
స్థితాం సర్వా గోప యువత్యో దదృశుః, ఇత్థం చ తాం పప్రచ్ఛుః।

గానం: శ్రీ ఆకొండి శ్రీనివాస రాజారావు, కాకినాడ.

కీర్తన

కల్యాణి(ఆహిరి) - ఆట
పల్లవి:	కథయ కథయ మాధవం హే రాధే
	కథయ కథయ మాధవమ్‌॥
అనుపల్లవి:	అథ సఖి కథయ శ్రీమధుసూదన మశేష
	విధినా వర్ణితవీర్య మమితవిభవమ్‌॥
చరణ (1):	వనభువి రహసి సమారాధితో భగవా
	ననవద్య సుందరాంగి హే రాధే
	ఘనజఘనయా త్వయా ఘననీలకుంతలశ్రీ
	వనమాలీ పీతవాసీ వసతి క్వవా జగతి॥
చరణ (2):	మృగమదకలితతిలక ఫాలసుందరం
	అగణిత సుగుణమణి రత్నాకరం
	విగతమోహ మఖిలవేదభాగ విదితం
	భగవంత మాశ్రితభావుక విధాతారమ్‌॥
చరణ (3):	సరసహాసరస సరళతరళ
	మురళీమిళిత గోపవధూజనం
	అరవిందలోచన మరివర్గసూదనం
	నరనారాయణతీర్థవాంఛితఫలనిదానమ్‌॥

08.10

శ్లో.

అథ చిరపరిభుక్తా శౌరిణాఽఖండరూపా
నిజసుఖపరితృప్తా బ్రహ్మవిద్యేవ గోపీ
వ్రజయువతిభి రుచ్చైః ప్రార్థితా సాభిలాషం
హరిపరతరభావం దర్శయంతీదమాహ॥

కీర్తన

రేగుప్తి(ధన్యాసి) - ఆట
పల్లవి:	హరి మేకరసా కృతి మధునా అవధారయతాగమవిధినా॥
చరణ (1):	చిరతరపురుషం ప్రతిభావపుషం పర మిహ వియ దాతతం
	ప్రశమితకలుషం భవరోగభయముషం ప్రత్యగభేద మనంతమ్‌॥
చరణ (2):	ఇద మితి సకలం జగ దతిచపలం మాయిక మధునాతనం
	పరిణతివికలం ఫల మివ విపులం కలయత పరిశోధనమ్‌॥
చరణ (3):	విలసిత మఖిలం గురుతరలీలం యద్వ దబోధవిధం
	క్షణమిహ విదితం సత్పున రుదితం పశ్యత పురతో హితమ్‌॥
చరణ (4):	అనుదయవిలయం ప్రియతమమభయం జగదుదయాదిదృశం
	యదవధివిదితం సకల మభిహితం నియత మబోధవశమ్‌॥
చరణ (5):	అసుకృతదురితం ఫలయుగరహితం కేవలబోధాత్మకం
	చిర మిహ మృగితం మునిజనవిదితం నిరవధిక సుఖాత్మకమ్‌॥
చరణ (6):	యదపృథ గఖిలం నిగమభాగఫలం భాతి హి పరదైవతం
	న భవతి భూతం న చ భావి సతతం సుకృతిభిరభిభావితమ్‌॥
చరణ (7):	నిరవధివిభవం నియతానుభవం భూమపదేనేరితం
	ఫల మివ కరగం సకలహృదయగం తత్త్వధియాఖండితమ్‌॥
చరణ (8):	అవచన మమతిం గతలోభరతిం నిరతనిస్తారఖిలం
	వ్రజపురవనితా గతతనుమమతాః స్వాత్మతయైవామలమ్‌॥
చరణ (9):	ఇద మిహ ఫణితం నిగమైరనుగతం కృష్ణరసైకాత్మనా
	హరిగురుకృపయానిగమజసుధియా నారాయణతీర్థేన॥

08.11

శ్లో.	ఏవం గోప్యస్తతః శ్రుత్వా సమాధాయ పరాత్మని కృష్ణే చిత్తం తదాకారాకారితం మౌనమాస్థితాః॥	20
శ్లో.	విస్మరంత్యః స్వకం దేహ మాత్మమాత్రావశేషితం బాలోన్మత్తాదయో యద్వదాత్మన్యేవ సమాహితాః॥	21
శ్లో.	కృతకృత్యాస్తదా దృష్ట్వా సర్వయోగేశ్వరో హరిః తాసాం తు పురతః కుర్వన్నాస్తే మాయావిడంబనమ్‌॥	22
శ్లో.	ముగ్ధాః స్నిగ్ధాంతరంగామురనరకరిపుంమూర్తిమత్తార్తిహంతం కామానాం కామరూపం కలితనవరసం కాలమేఘాభిరామం దృష్ట్వా హృష్ట్వా స్సుపుష్టా ఝటితిమురభిదం వేష్టయన్త్యో యథేష్టం త్వాలింగన్త్యోఽనురక్తాశ్శ్రుతయఇవ పరబ్రహ్మగోప్యో జగుస్తమ్‌॥	23

కీర్తన

కాంభోజి - ఆది
పల్లవి:	నాథనాథ మాకలయ నందనమ్‌॥
అనుపల్లవి:	మాధవ మఖిలగోపీమదనకోటిమోహనమ్‌॥
చరణ (1):	పాదపల్లవకలితపద్మకులిశాదిరేఖం
	వేదవేదాంతవిదితం విపులసుఖం
	సోదర మఖిలలోకసాధనకతయా భువన
	నాథ మమరేంద్రవంద్యనటవినోదమ్‌॥
చరణ (2):	బృందావనభువి గోపీబృందానందసందోహశ్రీ
	కుందసుందరరదనమందహసనం
	ఇందిరాసేవ్యపాదారవిందభక్తిమకరంద
	నందితామరభూసురనందనందనం సఖి॥
చరణ (3):	కుటిలాలకశైవాలభ్రుకుటిభుజగనయనశఫరి
	పటుతరలావణ్య రసతటినీనాయకం
	నిటలసుందరకస్తూరీచటులతిలకనందితశ్రీ
	ఘటితనారాయణతీర్థఘనపరిపాలకమ్‌॥

08.12

శ్లో.	ఉరసా మనసా దృష్ట్యా పరిష్వజ్య ముహుర్ముహుః కృత కృత్యాస్తదాత్మానం కృష్ణం మత్వా సమాస్థితాః॥	24
శ్లో.	ఆత్మారామోఽపి భగవా\న్‌ ఆత్మానం దర్శయన్పరం తతః ప్రభాతే గోపీభిః సహ గోకులమాగతః॥	25
ఇతి శ్రీనారాయణతీర్థవిరచితాయాం శ్రీకృష్ణలీలాతరంగిణ్యాం రాసక్రీడావర్ణనంనామ అష్టమ తరంగః॥