కీర్తనలు నారాయణ తీర్థ శ్రీకృష్ణలీలాతరంగిణి
ఏకాదశ తరంగం (శ్రీకృష్ణ ద్వారావతీప్రవేశ వర్ణనం)
శ్లో. శ్రీకృష్ణస్య ద్వారవతీ ప్రవేశాఖ్యం చరిత్రకం
వర్ణ్యతేఽత్ర మహాచిత్ర మేకాదశతరంగకే॥		 1
శ్లో. ఆదౌ గోప్యస్తతః కృష్ణ స్తదనంతర ముద్ధవః
సమాధానాయ గోపీనా ముద్ధవప్రేరణం తదా॥		 2
శ్లో. గోపికోద్ధవసంవాదః పునః కృష్ణస్య దర్శనం
విద్యాభ్యాసశ్చ విధినా గురోర్వాంఛితపూరణమ్‌॥		 3
శ్లో. జరాసంధేన సంగ్రామ స్తస్య సేనానిబర్హణం
తతో గుహాప్రవేశశ్చ నిధనం యవనస్య చ॥		 4
శ్లో. ముచుకుందస్తుతిశ్చైవ కృపయా తత్ప్రసాదనం
ద్వారకాయాం ప్రవేశశ్చ సంగ్రహోఽయం ప్రకీర్తితః॥		 5
ఉద్ధవాగమనమ్‌।
కీర్తన
నాదనామక్రియ - ఆది
ఉత్సాహం సర్వభూతానాం ఉగ్రకంసాదినిధనం
ఉచ్చై రనుగాయం గాయం ఉద్ధవోఽయం విరాజతే॥
 11.01
శ్లో. సమాధానాయ గోపీనాం గోవిందేన ప్రచోదితః
ఉద్ధవో గోకులజనైః పృష్టః ప్రత్యాహ కౌశలమ్‌॥		 6
శ్లో. నందాద్యైస్తోషితస్తత్ర మాధవోక్తిం నివేద్య చ
సంతం రహసి గోప్యస్తం ప్రాహుర్మధుపకల్పితమ్‌॥		 7
కీర్తన
కల్యాణి(సావేరి) - ఆట
పల్లవి:మధుప మధుప దూతం మన్యేత్వాం మాధవీయ మధునా॥
అనుపల్లవి:మధురాపురనారీ వదనాంబుజ
 మకరంద మాకలయ మాయాహి యాహి యాహి॥
చరణ (1):మధుప మధుపూరితం మాధురీవదన కమలం
 మాధవభాస్కర మహితకరకలితం
 అధునా యాదవకరుణా సుధయాసముల్లసితం
 కథయ కథయ కిమిహ కామయ కలయ కామం॥
చరణ (2):భ్రమర భ్రామ్య మకరందసంభృతేషు
 పావనగోవింద పదచిహ్నితేషు
 కమనీయమధురా కాంతారపాదపేషు
 కిమపి మాధవవృత్తం కేన వాదరణీయ మిహ॥
చరణ (3):అల మసితసఖ్యేన స్మితభాషణే నాలం
 చల చంచలస్వభావ చంచరీక
 పరికలయ మాధవం బహు ధామరగీతం
 వరనారాయణతీర్థ వరదం విజయగోపాలమ్‌॥
 11.02
శ్లో. శ్రుత్వా తద్గోపికాగీతం శ్రావ్యం శ్రుతిమనోహరం
తత్త్వమావేదయ\న్‌ గోపీః ప్రత్యాహోద్ధవ ఉత్సుకః॥		 8
కీర్తన
రేగుప్తి(మోహన) - ఆట
పల్లవి:గోపీజనగోమధ్య చరంతం గోపాలం విద్ధి గోపాలం॥
చరణ (1):అంతరంగే సతతం భాంతం ఆదిమధ్యాంతవసంతం
 సంతతం సత్సు చరంతం సత్య మేకాంతం
 అంతరే యోగివిచింత్యం అనుపమ సకలాగమాంతం
 హంత దురంత సంసారబంధ హంతారం విహరంతమ్‌॥
చరణ (2):సంయోగ వియోగ విహీనం సాధుమానస జీవనం
 మాయోపాధివిదళనం మానసాసనం
 కాయక్లేశాది విహీనం కారణమానవజన్మానం
 భూయోభూయో విచార్యైనం భూమానం భూరి మహిమానమ్‌॥
చరణ (3):బుద్ధివికల్పితభేదాభేదం బోధబాధిత సర్వఖేదం
 సిద్ధసంభావితసిద్ధిదం శ్రితజనబర్హివారిదం
 బుద్ధముక్తసిద్ధవేద బోధితానందమోదం
 సిద్ధనారాయణతీర్థ సేవితశ్రీపాదమ్‌॥
 11.03
శ్లో. విగళితభయశోకా విద్యయా లబ్ధతత్త్వాః
కథమపి పరతత్త్వే స్థాపయిత్వా మనాంసి
ముహురపి పరభక్త్యా విశ్వవంద్యే ముకుందే
మధుకరపరికౢప్తం తం ప్రతి ప్రాహురిత్థమ్‌॥		 9
కీర్తన
ధన్యాసి - త్రిపుట
పల్లవి:కిము రాజతే రాజసదసి॥
అనుపల్లవి:కుముదగణేషు కోటికోటిసంఖ్యాకేషు
 కుముదబంధు రివ కోటి మదన ఇవ॥
చరణ (1):మధుపకులవతంస కథయ మధుమాధవచరితమిహ
 మధుకరాచారసికోఽథమాధవో విజయతే
 కథ మపి కదా కింస్మరతి న స్సదసి రహసి
 కిము కుశలీ వనమాలీ సుగుణశాలీ॥
చరణ (2):స్మరతి కిమథ బృందావనభువి
 పరమరహసి నిశిముదా పరయా యత్సుకృతం
 సరళమురళీరవసుధయా సమాకృష్ట
 సురవనితాగణసరససంగీత మిహ॥
చరణ (3):కతికతి సంతి న కలహంసగతయః
 తత్పరిచర్యావిధానైకకుశలాః
 త దిహ న స్మర తీతి సాధు విదిత మిహ
 త దల మసితసంగవార్తయా విఫలయా॥
చరణ (4):మధురానగరీనారీమధురసంగీతరసికే
 మాధవే వసతి మధురాయాం మధురం
 వందిమాగధై రధికం గీయతే గీతం జయ హే
 గోపికాజార గోపీనాథేతి న హి కిమ్‌॥
చరణ (5):సృతపంచదశకలాచంద్ర ఇవ జీవాయో
 ధ్రువకలయా వయ మధునా
 ఇతి మధుసూదనం వద యాహి మాధవం
 ప్రతి నారాయణతీర్థ ప్రత్యగాత్మాన మసితమ్‌॥
 11.04
శ్లో. దత్తోత్తరస్సమాధాయ గోపీబృందం స చోద్ధవః
పునర్వివేశ మధురానగరీం హరిమందిరమ్‌॥		 10
శ్లో. మధురిపుం మధురాపురనాయకం
సమధిగమ్య నచోద్ధవనామకః
రహసి గోపవధూపరిభాషితం
మధురమాహ మనోభవరూషితమ్‌॥		 11
కీర్తన
కాంభోజి - ఆది
పల్లవి:ఇతి వదతిహి గోపీ గోపాలకృష్ణ ఇతి వదతిహి॥
అనుపల్లవి:నతయోనుతయః స్మృతయః కృతయః ప్రతిపదమస్మాభిస్త్వయి విహితాః॥
చరణ (1):మధురం మధురానగరీ నారీ మధురం గాయతి మధుసూదనతే
 అధునా మాధవ తవ కియ దస్మత్‌ కృతిభి ర్నుతిభి ర్నతిభిః స్మృతిభిః॥
చరణ (2):నందముకుందం పరమానందం మందస్మేర సుధావదనేందుం
 బృందావన భువి సంతం వందే స్మారం స్మారం వారం వారమ్‌॥
చరణ (3):శ్రుతయ స్స్మృతయః కథయంతి త్వాం సుదియః స్వాంతఃకరణే సంతం
 తదపి మనో మే నందకిశోరం స్మరతిహి యువతీకరిణీకలభమ్‌॥
చరణ (4):మణినాయకమణిరపి పరమ మధునా గుణయోగేసతి కాచమణీనాం
 మరకతమణిరపి మధ్యేఘటితో గణనీయః కిం నహి కాచేషు॥
చరణ (5):ఇతి గోపీజనకథితం ప్రథితం నిజజనకథితం విదితం హరిణా
 యతినారాయణతీర్థ గ్రథితం గురువరకరుణాభరితం గీతమ్‌॥
 11.05
శ్లో. నిత్యసిద్ధాగమజ్ఞోఽపి భగవా న్సబలోఽగమత్‌
విద్యార్థీ లోకశిక్షార్థం సాందీపని మునిం గురుమ్‌॥		 12
సాందీపనే రాగమనమ్‌ గీయతే।
కీర్తన
నాదనామక్రియ - ఆది
నిష్పన్న వేదవిజ్ఞానో నిత్యం స్వాధ్యాయతత్పరః
శిష్యోపశిష్యసేవితో సాందీపని ర్విరాజతే॥
 11.05
శ్లో. గృహీతవిద్యో భగవా\న్‌ బలరామసహాయవా\న్‌
గురుం ప్రసాద్య విధినా స తస్థౌ బ్రహ్మచారిభిః॥		 13
కీర్తన
సారంగి(కేదారగౌళ) - ఆది
పల్లవి:కంసాసుర సంహరణం కలయ కృష్ణ
 సంసారసింధుతారణ॥
అనుపల్లవి:పుంసామనన్యపురాణపురుషోత్తమ
 హంసయతీశ్వరశంసితచరణ॥
చరణ (1):పంచజనాసురపాతకకలితశ్రీ
 పాంచజన్యదరపటుతరనాద
 వాంఛితగురుపుత్ర జీవనకారణ
 మంజుళమౌక్తికమాధవధృతవేద॥
చరణ (2):వాచామగోచర వసుదేవతనయ
 సదాచారపాలక దనుజాంతక
 హే చారుకమలవిలోచన భవపాశ
 మోచన శతకోటిమన్మథమోహన॥
చరణ (3):వారిజసంభవవందితపాదాబ్జ
 భూరిదయారస భువననాథ
 నారాయణతీర్థ నతచరణాంబుజ
 నానావిధలీలావినోద॥
 11.06
శ్లో. జరాసంధస్య సైన్యాని హతాని హరిణాఽసకృత్‌
నిహతః కాలయవనో ముచుకుందముఖాగ్నినా॥		 14
శ్లో. చిరసుప్తోత్థితస్యాస్య ముచుకుందస్య పశ్యతః
అనుగ్రహాయ భగవానావిర్భూతో గుహాంతరే॥		 15
శ్లో. ముచుకుందోఽపి తం దృష్ట్వా బంధహంతారమాత్మనః
నృసింహపదసంలక్ష్యం ప్రణమ\న్‌ స్తౌతి దివ్యదృక్‌॥		 16
కీర్తన
కాంభోజి(కల్యాణి) - జంపె
చరణ (1):వేదాద్రిశిఖర నరసింహమాకలయామి
 విమలవిద్యుజ్జ్వలితజిహ్వం
 వేదాంతవేద్యవిమలానందవిజ్ఞాన
 విదళితదురంతభవమోహం త్వాం నౌమి॥
చరణ (2):పరభావభావనాధృఢబంధహరమఖిల
 సురవైరిదళనఖరనఖరం
 పరిపూర్ణకరుణాసుధాసమాహ్లాదిత
 ప్రహ్లాదభయహరముదారం త్వాం నౌమి॥
చరణ (3):ఘోరసంసారతారకతారకాధిపతి
 తరణిమండలకోటిభాసం
 క్షీరగంభీరవారిధిమథనసంజాత
 వరలక్ష్మీకౌస్తుభోల్లాసం త్వాం నౌమి॥
చరణ (4):జగదండశతకోటిజననీకళత్రమిహ
 జన్మమరణాదిభయవిదూరం
 నిగమమయఖగవరయానసంచార
 నియతలీలామయశరీరం త్వాం నౌమి॥
చరణ (5):మణిమయకిరీటమణిమకరకుండలకాంతి
 మథితదిగ్దశతిమిరభారం
 అణిమాదిభూతిదమనన్యశరణార్థినాం
 ఆధారమఖిలసుఖసారం త్వాం నౌమి॥
చరణ (6):నిరవద్యగుణరత్ననిర్మలాంతఃకరణ
 వరణీయవరదాననిపుణం
 ధీరశివనారాయణానందతీర్థయతి
 గూఢపరమార్థ మతికరుణం త్వాం నౌమి॥
 11.07
శ్లో. ఉద్ధరోద్ధర గోవింద పతితం భవసాగరే
భీకరే శ్రీహరే కృష్ణ వృష్ణివంశసముద్భవ॥		 17
శ్లో. ఇతి స్తువంతం ముచుకుందమాదరాత్‌
కృపాసుధావర్షిదృశాఽవలోక్య సః
హితం సమాదిశ్య చ సత్వరం పునః
వివేశ శౌరిర్మధుర మరిందమః॥		 18
శ్లో. ద్వారకానగరీ హార్మ్యశారికా గీతసారికా
తారకోత్కలికా మౌనితారకానందపూరకా॥		 19
శ్లో. శర్మదా నిర్మలధియాం నిర్మితా విశ్వకర్మణా
తత్ర సంతం హరిం పౌరాస్తుష్టాస్తుష్టువురీశ్వరమ్‌॥		 20
కీర్తన
సావేరి - ఆట
పల్లవి:వయం ధన్యా వయం ధన్యా
 వయం ధన్యా దేవ వసుధాతలే॥
అనుపల్లవి:స్వయం వ్యక్తం పరం తత్త్వం
 హరిం త్వా మివ లోకయామః॥
చరణ (1):నిఖిలలోకనిదాన నిగమబృందైకమాన
 సుఖసత్యామితజ్ఞాన సురపాలన
 మఘవదాదిపావన మాయయా కృతభువన
 అఘమూలవినాశన అచ్యుతానంగమోహన॥
చరణ (2):జలధిమధ్యనిర్మిత జాంబూనదవర
 కలితగోపురహర్మ్య గణకమనీయా
 జలజనాభ తావక జనరమ్యద్వారకా
 అల మధునాఽస్మాభి రవలోక్యతే॥
చరణ (3):వసుధాసుధాసౌధ వసతీకృతవాస
 కుసుమబాణవిహరణ కూలవన
 వసుదేవభాగధేయ వామదేవాదిగేయ
 వసుద నారాయణతీర్థ వరద విజయగోపాల॥
 11.08
శ్లో. అమరదుర్లభభూతిరియం సతీ
విమలమానసహంససమాకులా
కమలనాభ రమాతిమనోరమా
సతతమస్తు తవాద్య మహాపురీ॥		 21
శ్లో. అద్యాపి భక్తా ననుకంపయ\న్‌ ముదా
హృద్యానవద్యాం నగరీమధిష్ఠితః
నిరస్తశత్రు ర్భగవా\న్‌ విరాజతే
క్ష్మయా చ లక్ష్మ్యా సహ సర్వసంపదా॥		 22
ఇతి శ్రీనారాయణతీర్థవిరచితాయాం శ్రీకృష్ణలీలాతరంగిణ్యాం
శ్రీకృష్ణ ద్వారావతీప్రవేశవర్ణనంనామ ఏకాదశ తరంగః.
AndhraBharati AMdhra bhArati - nArAyaNa tIrtha - Krishna lila tarangini - Krishna leela tarangini - Krishnalilatarangini - Krishna lila taramgini - nArAyaNa teertha Narayanateertha Narayana teerdha Narayanateerdha andhra telugu tenugu ( telugu andhra )