ఆంధ్రభారతి - నారాయణ తీర్థ - నారాయణతీర్థ తరంగములు

గానం: శ్రీ ఆకొండి శ్రీనివాస రాజారావు, కాకినాడ.

ద్వాదశ తరంగం (శ్రీకృష్ణరుక్మిణీకల్యాణమహోత్సవ వర్ణనం)
అథ రుక్మిణీకల్యాణమహోత్సవ వర్ణన మభినీయతే।
శ్లో.	భీష్మోథ రుక్మీ తత్పుత్రో రుక్మిణీ తత్సుతా సతీ వసుదేవో దేవకీ చ బలకృష్ణౌ సబాంధవౌ॥	1
శ్లో.	రుక్మిణ్యా లిఖితం పత్రం శ్రీకృష్ణాయ నివేదితమ్‌ బ్రాహ్మణేన తత స్తత్రరథేనాగమనం హరేః॥	2
శ్లో.	రాజ్ఞాం సమక్షం రుక్మిణ్యాః ప్రాణిగ్రహణమంగళం రుక్మిణ్యా సహ కృష్ణస్య ద్వారకాయాం సమాగమః॥	3
శ్లో.	రుక్మిణీకృష్ణయో స్సమ్య గ్వివాహస్తదనంతరం అష్టపత్నీ సమాహారః కథాసంగ్రహ ఈరితః॥	4
తద్రాదౌ భీష్మాగమనమ్‌।

కీర్తన

నాదనామక్రియ - ఆది
ధీమా నిహ శ్రీమానయం	భీమపరాక్రమాన్వితః
భూమౌ విఖ్యాతమాహాత్మ్యో	భీష్మో రాజా విరాజతే॥

12.01

అథ రుక్మ్యాగమనమ్‌।

కీర్తన

నాదనామక్రియ - ఆది
రుక్మీ రుక్మిణ్యవరజో	రుచిరాంగదకుండలీ
తిగ్మాంశుసమకిరీటీ	దివ్యాయుధః సమాయతి॥

12.02

గద్య.

అథ భీష్మమహారాజో రుక్మిణ్యాః స్వసుతాయావివాహ
మహోత్సవాయ వరమన్విష్య\న్‌ స్వమంత్రిభిః కులవృద్ధైశ్చ సమం
పర్యాలోచ్య వాసుదేవం వరం రోచయామాస కిల। రుక్మీచ
తద్వృత్తం జ్ఞాత్వా చైద్య పక్షత్వాత్సామర్ష మువాచ।
అల మహో విచారేణ గోపాలవరకన్యాప్రదాన విషయేణ।
అయం హి జారచోరశిఖామణిః పరతంత్రో నాస్మత్కులోచిత
నర ఇతి। రాజాపి పుత్రస్నేహవశాత్తద్రోచయామాస॥

కీర్తన

నాదనామక్రియ - ఆది
ఆయాతి శ్రీరుక్మిణీ శనై రిహ	గేయయోషిద్భి రధునా
కృష్ణమేవచింతయంతీ సదా హృది	వృష్ణివంశసింధుచంద్రం
సౌందర్య నిందితామరీ నిరంతర	చారుతరనీలకబరీ
తన్వీ స్వతనుభానునా పరాజిత	తపనకిరణా తరుణీ॥

12.03

శ్లో.	క్రీడాగృహం సమాయాంతీం క్రీడంతీం స్వసఖీజనైః ప్రత్యాహ రుక్మిణీం దూతీ యద్వృత్తం భీష్మమందిరే॥	6
శ్లో.	రౌహిణేయే కృతోద్వాహే రేవతీప్రాణవల్లభే శ్రీకృష్ణస్యాథ సమయో వైవాహికమహోత్సవే॥	7
శ్లో.	ఇతి ద్వారవతీపౌరాః ప్రశశంసుః పునః పునః రుక్మీ చ రుక్మిణీం దాతుం శిశుపాలాయ రోచతే॥	8
శ్లో.	పుత్రస్నేహవశాద్రాజా తథైవ హృది నిశ్చితః ఏవ మాలోచితం సర్వైః బంధుభిశ్చాపి మానిని॥	9
శ్లో.	ఇతి దూతీవచః శ్రుత్వా రుక్మిణీ న్యపతద్భువి ఉపలభ్య శనైస్సంజ్ఞాం ప్రలపత్యమలాశయా॥	10

కీర్తన

ఆహిరి(ఆనందభైఅరవి) - ఆది(జంపె)
పల్లవి:	వీక్షే కదా దేవదేవం	గోపాలమూర్తిమ్‌॥
అనుపల్లవి:	సాక్షాన్మన్మథకోటి	సౌందర్యభావ్యమ్‌॥
చరణ (1):	ప్రకట మృగమదతిలక	రమణీయఫాలం
	సకలగుణసంపత్తి	సహిత మరుఖేలమ్‌॥
చరణ (2):	బృందావనాంత భువి	విశ్రుతవిహారం
	నందనందన మఖిలా	నందితాకారమ్‌॥
చరణ (3):	కాలమేఘశరీర	కలితవిద్యుద్వసనం
	కేళీకలాకుతుక	కించిత్కుంచితాధరమ్‌॥
చరణ (4):	తధిమిధిమికిధిమీతి	తాండవవిలోలం
	సిద్ధజనవినుత ప్ర	సిద్ధతరశీలమ్‌॥
చరణ (5):	సరసమురళీగీత ర	సామృతలహరీ
	నిరత నారాయణతీర్థ	నిర్మల మనోహంసమ్‌॥

12.04

శ్లో.	నిధాయ హృది గోవిందం రుక్మిణీ రుక్మభూషితా మనః సంబోధ్య గోవిందే సమాధాయేద మాహ తత్‌॥	11
శ్లో.	రేరే చేతః శృణు విమలహృత్పుండరీకాంతరస్థే యస్మిన్‌ మాయావిలసిత జగత్కోటయస్సంతి భూమ్ని గోపాలం తం భజ నిగమవిద్యావిలాసానుపాలం భూపాలం తం పరిపూర పునర్జన్మ బంధైక మూలమ్‌॥	12

కీర్తన

సావేరి(రేగుప్తి) - ఆట
పల్లవి:	రే రే మానస గోపాలం భజ దూరే పరిహర భూపాలమ్‌॥
అనుపల్లవి:	ఆరా దంతరతర మఖిలాత్మక బోధానందఘనం బాలమ్‌॥
చరణ (1):	విమలహృదయకమలోదారం వేదశమిత వివిధవిషయాకారం
	కమనీయతరకరుణాసారం సర్వసమభావభావమహోదారమ్‌॥
చరణ (2):	సామాదినిగమాంతసంచారధీర ధీమదనుస్మృతగుణాకారం
	సమరసమేకమనంతమనన్వయ మమితనిరంతరసుఖసాగరమ్‌॥
చరణ (3):	జగదండకోటిపరాకాశం సర్వ నిగమాంతవిదితస్వప్రకాశం
	అగణితగుణమణివాగీశం దేవ మాగమరూపనిజాదేశమ్‌॥
చరణ (4):	విగళితమోహజభవపాశం విశ్వ మంగళకృతతనుమఖిలేశం
	భగవంతమాదిగురుం శివమద్వయచిద్గగనం నవనీతాశమ్‌॥
చరణ (5):	సుందరతరమురళీవాదం ముని బృందవిచింత్య సుందరపాదం
	నందతనయ మఖిలానందం శర దిందువదన మిహ గోవిందమ్‌॥
చరణ (6):	బృందావనహితగోబృందధృతమందర మఖిలనిగమకందం
	నందసునందాదివంద్యమనన్యక నారాయణతీర్థయతివరదమ్‌॥

12.05

శ్లో.

ఇతి నిశ్చిత్య సా భైష్మీ గోవిందావాప్తయే హృది
ఆరాధయంతీ తం కృష్ణం ప్రేమభక్త్యేదమాహ చ॥

కీర్తన

కమాస్‌(పంతువరాళి) - ఆది
పల్లవి:	గోపాల మేవ దైవతం భజే	గోపాల మేవ దైవతమ్‌॥
చరణ (1):	సర్వలోకకారణం	సత్యకామాదిగుణమ్‌॥
చరణ (2):	భక్తానుగ్రహాభివ్యక్త	భవ్యమూర్తిధారిణమ్‌॥
చరణ (3):	యాదవాబ్ధిచంద్రమిహ	యతిజనమోహాపహమ్‌॥
చరణ (4):	కంసాదివైరివిరామ	కలితదివ్యవిగ్రహమ్‌॥
చరణ (5):	గోపీకావనకుముద	గురుతరచంద్రోదయమ్‌॥
చరణ (6):	ఘోరసంసారకారణ	వారణకేసరిణమ్‌॥
చరణ (7):	మనసాఽపి న గణయామి	మాధవా దన్యదైవమ్‌॥
చరణ (8):	భవ్యనారాయణతీర్థ	దివ్యదృగ్విధాయినమ్‌।

12.06

గద్య.	తతోరాజవిగ్రహధారిణే సురవిద్వేషకారిణే శిశుపాలనామ్నే స్వాం దాతుం కృతనిశ్చయం స్వజనం జ్ఞాత్వా సా రుక్మిణీగోప రమణీమానస మానససరోవరరాజీవరాజి విరాజమాన రాజహంసం మర్దితమహాసురకంసం భక్తజనరచిత ప్రశంసం గోవిందం ఆత్మానందం స్మారం స్మారం విగత మానుషభోగతృష్ణా శ్రీకృష్ణైక బంధుత్వ నిష్ణాతా నిజసహచర సాహచర్యావలంబినీ సదాస్తే॥	14
శ్లో.	బ్రాహ్మణం బ్రహ్మవిద్వరం బ్రహ్మణ్యేవ పరాయణం దృష్ట్వా తు లిఖితం దత్వా తమాహానయ వై హరిమ్‌॥	15
శ్లో.	లిఖిత్వా లిఖితం దత్తం విప్రహస్తే తు కన్యయా గృహీత్వా లిఖితం విప్రస్త్వరయా ద్వారకం యయౌ॥	16
శ్లో.	స గత్వా ద్వారకాం రమ్యాం దృష్ట్వా గోపాలనందనం విజ్ఞాపయామాస వచో రుక్మిణ్యా లిఖితం ద్విజః॥	17
రుక్మిణ్యాః పత్రికాలేఖ ప్రకారః।
గద్య.	తథాహి శ్రీమతే సత్యకామ సత్యసంకల్ప సర్వకామ సర్వరస సర్వగంధ సర్వసంకల్పాది గుణవతే కృతాకృత మాతృమానమేయ భేదభిన్నసకల జగదాధారావభాసకాయ నిష్ప్రత్యూహ నిరతిశయానందావధీరిత బ్రహ్మలోకానందాయ విశ్వవైశ్వానరాది సకల నామ రూప నిర్వాహకాయ సర్వత్ర శక్తి సమన్వితాయ సర్వాంతర్యామిణే దుష్టనిగ్రహ శిష్టప్రతిపాలకాయ భక్తానుకంపయా పరిగృహీత గోపకుమార భావాయ కరచరణ నళిన విలసిత ధ్వజ వజ్రాంకుశాది రేఖాయ మహాపురుష లక్షణాయ కనకమణిమయ మకరకుండల కటకకటిసూత్రాంగదాది దివ్యభూషణభూషితాయ భక్తజనకామితకామవర్షి మహామోఘ నీలమేఘ సముజ్జ్వల విద్యుత్పుంజ కల్ప దివ్య పీతాంబర ధారిణే శ్రీవత్సకౌస్తుభాది శోభితాయ దీనదయాపరమూర్తయే శ్రీకృష్ణాయ శతకృత్వస్సహస్రకృత్వశ్చ నమోనమః।	18
శ్లో.	త్వత్ప్రసాదం పరం కాంక్షే కృష్ణ నాన్యం తు కామయే మనసా వచసా నూనం మత్పాణిగ్రహణం కురు॥	19

కీర్తన

సావేరి(మధ్యమావతి) - ఆట
పల్లవి:	కాంక్షే తవ ప్రసాదం	గోపాలబాల కేవల మే వాహమ్‌॥
చరణ (1):	అమితభాగ్యదాతార	మతులభూరివిస్తారం
	కమనీయకరుణాకరం	గోపాలబాల
	విమతమదవిదారకం	విద్వజ్జనాధారం
	శమితభూరిభూభారం	శకలీకృతారినికరమ్‌॥
చరణ (2):	కామయే నాన్య మహం	కంసారేఽతిదురూహం
	శ్యామసుందరవిగ్రహం	గోపాలబాల
	నామరూపనిర్వాహం	నానాభువననివహం
	త్వా మేవాశ్రయే సాహం	త్వరయానయమాం స్వగేహమ్‌॥
చరణ (3):	ధరణిమండలతిలక	తాపసతారక
	పరిజనసుఖకారక	గోపాల బాల
	కలవేణునాదరసిక	ఘనతరమౌక్తిక
	వరనారాయణతీర్థ	వారితదుస్తరానర్థ॥

12.07

శ్లో.

నాన్యంవృణే పతి మశేషగురో రనంతాత్‌
త్వత్తస్సమస్తగుణధామభిరాత్మతుల్యాత్‌
క్షేమం సదైవ గురుదేవశిఖామణే త్వాం
యాచే త్వదంఘ్రికమలే ప్రణతాస్మి నిత్యమ్‌॥

కీర్తన

సావేరి(శహన, మోహన) - ఆది
పల్లవి:	క్షేమం కురు సతతం గోపాల	మమ క్షేమం కురు సతతమ్‌॥
అనుపల్లవి:	కామం తవపాద	కమలే భ్రమరీభవతు శ్రీ
	మన్మమ మానసం	మధుసూదన॥
చరణ (1):	అక్షీణకరుణానిధే ఆనందఘన	ప్రక్షీణదోషతతే
	శిక్షితాసురగణ	రక్షితనిజజన
	కుక్షిస్థితానేక	కోటిలోకావన॥
చరణ (2):	ప్రహ్లాదభయవిదూర పరమయోగి	పావన భువనాధార
	మోహరహితచిత్త	మౌనిమానసహంస
	సాహసహతవైరి	సంఘమహోదార॥
చరణ (3):	అజితవిజయగోపాల అనంతలీల	అద్భుతపదకమల
	విజయద్వారకాపురీ	విమల కమలాలోల
	నిజనారాయణతీర్థ	నిత్యానందబాల॥

12.08

శ్లో.	గౌరీశంకరపూజార్థం యాత్రా మే నగరాద్బహిః యదా తదా హ్యవసరో భవతో మత్పరిగ్రహే॥	21
శ్లో.	ఇతి విప్తముఖాచ్ఛ్రుత్వా రుక్మిణ్యా లిఖితం హరిః ప్రత్యుత్తరం లిఖిత్వాఽథ తత్ర గంతుం మనో దధే॥	22
రుక్మిణీవచనమ్‌।
శ్లో.	హే సూనాస్త్ర సముల్లసద్విరహిణీ సంహారదోషా దిహ ప్రాప్తోసి త్వమనంగతాం తవశరాః పంచత్వ మాపు ర్ధ్రువం చాపస్తే ధరణీం గతః స్మర నదీగామీ త్వదీయో ధ్వజః త్వేవం కృచ్ఛ్రగతోపి మన్మథ వధూహింసాగుణం నోజ్ఝసి॥	23
శ్లో.	అకళంకః కమలాప్తస్సౌమ్యశ్శౌరిర్భవాంస్తు సకళంకః కమలారిరుగ్రమౌళిః కథమిందో తవాప్యహో విధునామ॥	24
శ్లో.	శ్రీకృష్ణహృదయం జ్ఞాత్వా పునరాగమనే ద్విజః శ్రీకృష్ణాగమనోత్సాహం ప్రాహ భైష్మీం ప్రతి ప్రియమ్‌॥	25

కీర్తన

యదుకులకాంభోజి - ఆది
పల్లవి:	శరణం జగతా మేవ	సకలాంతరాత్మా
	త్వర యై వాయాతి	హరిస్తే మతి మాతనుతే॥
చరణ (1):	వనమాలీ కిల నూనం	వసుదేవాపత్యం
	సనకాదిమునిసనకాదిముని హృదయ	సత్కమలసంవేద్యమ్‌॥
చరణ (2):	చారుతరేణరథేన	దారుకసారథినా
	ద్వారవతీనగరా	దాయాతి తవ స్వామీ॥
చరణ (3):	మాబాలే కురు చింతాం	మంజుతరాలాపే
	మాధవ మేష్యసి నూనం	వసుధాతలతిలకమ్‌॥
చరణ (4):	క్షేమం కురుతే తవ	క్షీరాబ్ధిశాయీ
	శ్రీమా నఖిలాత్మా	చామీకరపరిధానీ॥
చరణ (5):	హరిచరితమధు నారాయణ	తీర్థముఖోద్గళితం
	పరిజనమునినరమత్త	భ్రమరైరాపీతమ్‌॥

12.09

శ్లో.	ద్విజముఖ సరసిజ గళితం హరివచనామృతం సమాపీయ ఆనందానుభవాఢ్యా రుక్మిణ్యాస్తే మనస్సమాధాయ॥	26
గద్య.	అథ కోసల కురు పాంచాల మైథిల చేది మాగధ మత్స్య మాళవ వంగ కళింగ సౌరాష్ట్ర ఘూర్జర మహారాష్ట్ర సైంధవ కాశ్మీర కేరళ కొంకణ ద్రవిడ నేపాళ కర్ణాటకాది దేశాధిష్ఠితారో మహాప్రభావాః అతిరథ మహారథాది పద్మ మహాపద్మ సంఖ్యాక సైన్యకాః రాజత జాంబూనద మహార్హ వజ్ర వైడూర్య మరకతాది విచిత్రరత్నయుతానేకకోటితటిద్రత్న ప్రద్యోతమాన దివ్య విమాన సమారూఢాః ధిక్కృత సురసంపదః మత్త మాతంగ తురంగ వాహన వాహినీ శత పరివేష్టితాః మదనమదాపహారి సౌందర్య శాలినః సకల కలాకుశలాః కుండిననగరవర పరిసర సముదితాః పంక్తిరథాస్సమాసతే॥	27
శ్లో.	త్రైలోక్య సంపత్కలయావతీర్ణా యా రుక్మిణీ సాగరరాజకన్యా సేయం భవానీభవభావయుక్తా సంపూజ్య నిర్యాతి సఖీసమేతా॥	28
శ్లో.	అత్రాంతరే ద్వారవతీనగర్యా రథేన గత్వా స రథాంగపాణిః ఆస్తే మహీపాలమహాసభాయాం సూర్యో యథా దీపసహస్రమధ్యే॥	29
గద్య.	తత్ర ఖలు వేత్ర పాణయః నిరస్త సమస్త సమ్మర్దా రుక్మిణ్యాః పరిజనాం పరితో బభూవుః॥	30
శ్లో.	పదాంగుళిన్యస్తదృశం వ్రజంతీం భైష్మీం ప్రతి ప్రాహ చ దర్శయంతీ తస్యా స్సఖీ రాజసుతా\న్‌ క్రమేణ వేత్రేణ విజ్ఞాపయతీవ దూతీ॥	31

కీర్తన

ముఖారి - ఆట
దూతీ:	కోమలాధరి రుక్మిణి కోసలాధిపతి రయం
	కామసుందరమాకలయ కల్యాణి రాజకన్యకే॥
రుక్మిణీ:	దూతి మాకురు విలంబం నీతిసారజ్ఞేసుందరి
	భాతి కిన్న తే మామకం భావుకం మానసవృత్తమ్‌॥
దూతీ:	పశ్య పాంచాలమైథిలౌ పార్థివావథ సంపన్నే
	నిశ్చలా విభూతి ర్యత్ర నీతి రప్యబ్జలోచనే॥
రుక్మిణీ:	తారకా ఇవ దృశ్యంతే శారదచంద్రసన్నిధౌ
	వారయ దూతి పార్థివా\న్‌ సారవివేకచతురే॥
దూతీ:	కౌరవం కలయ దేవి కురుదేశాధిప మిహ
	పౌరజానపదోపేతం పద్మపత్రలోచనే॥
రుక్మిణీ:	అత్ర కిన్నుతే విచిత్రం చిత్ర చారిత్ర సంపన్నే
	తత్ర తత్రాట తన్వంగి తామసీ మాభవ దూతి॥
దూతీ:	మాగధమత్స్యమాళవ వంగకళింగసౌరాష్ట్ర
	నగరఘూర్జరదేశ నరపాలానాలోకయ॥
రుక్మిణీ:	సంతు రాజానో దూతికే సఖి సహస్ర శోభిని
	కిం తతో మే చల బాలే కీర్తి మాకలయ మయి॥
దూతీ:	కేరళనేపాళ కొంకణ ద్రవిడాంధ్ర కర్ణాటక కోసల కురుపాంచాల
	ధరణీ పాలకా నవ ధారయ రాజకన్యకే॥
రుక్మిణీ:	చర్వితచర్వణే నాలం చక్రిణం దర్శయ బాలే
	సారకమలసంకాశాక్షం శారదచంద్రసన్నిభాస్యమ్‌॥
దూతీ:	సుందరం పశ్య సుందరి నందయశోదానందనం
	నందనందన మాకలయ నారాయణతీర్థయతిగీతమ్‌॥
రుక్మిణీ:	ద్వారకాపురీపాలకం దూరితదుర్జనజాలకం
	ధీర మాకలయే కృష్ణం వసుదేవ దేవకీతనయమ్‌॥

12.10

శ్లో.	వైదర్భీవసుదేవసూనునయనా న్యన్యోన్యవిన్యాసతో ధన్యానా మపి ధన్యతాం ........ కన్యావరాణాం ధురి అన్యోన్యోపమితాని యాని భువి సంత్యన్యాని వస్తూనితత్‌ సర్వస్యాప్యుపమాపయంత్వితి తయో శ్చిత్తైకతాం కుర్వతే॥	32
శ్లో.	గృహీత్వా పాణినా పాణిం రుక్మిణ్యాస్త్వరయా ప్రభుః ఆరోప్య స్యందనే భైష్మీం ద్వారకాం ప్రస్థితో హరిః॥	33
శ్లో.	రుక్మీ తు సమరే కృష్ణం జేతుమగ్నిం పతంగవత్‌ ప్రవృత్త స్తేన నిర్జిత్య రథే బద్ధః పశు ర్యథా॥	34
శ్లో.	రుక్మిణ్యా ప్రార్థితః కృష్ణో రుక్మిణం చ తదగ్రజం ప్రాగ్బంధాన్మోచయిత్వాఽథ ప్రహస\న్‌ ద్వారకాం యయౌ॥	35
శ్లో.	సమగ్ర సేనయా సార్థం మధ్యేమార్గం సమాహితః బలభద్రోఽఖిలా\న్‌ జిత్వా పార్థివా\న్‌ ద్వారకాం యయౌ॥	36
శ్లో.	రుక్మిణీసహితే కృష్ణే ద్వారకాపురమాగతే వసుదేవాదయస్సర్వే సంతుష్టాస్తాశ్చ యోషితః॥	37
గద్య.	తత్ర ఖలు ద్వారవత్యాం సకలసురభూసుర గరుడగంధర్వ కిన్నర విద్యాధర ప్రముఖామర సహిత సంపదధరీకృతేంద్ర మహాసభాయాం తప్తజాంబూనదానేకకోటి చంద్రరవికాంతస్ఫటిక సంఘటిత వజ్రవైడూర్యాద్యనేకరత్న స్తంభ మంటప విరాజమాన సురగురుస్పర్ధావర్ధిత విద్యాద్విబుధోన్నత సంకులాయాం అనేకకోటి మహాకవి వంది గాయక పరిహాసకాది లక్షణలక్షితాయాం ఇక్షుక్షీరదధిమధుఘృతగుడగోరోచన జీరకమరీచికాది మంగళ ద్రవ్యసంభారవత్యాం గర్గప్రభృతయః వసుదేవానుమత్యా మహాసంకల్పపూర్వకం రుక్మిణీకృష్ణయో ర్గాంధర్వవిధినా వైవాహిక మహోత్సవాయ లగ్నాష్టకమారంభత।	38
శ్లో.	సత్యజ్ఞానసుఖస్వరూపమమలం సర్వోత్తమం నిత్యదృక్‌ ప్రత్యక్తత్త్వమచింత్యశక్తివిలసద్విశ్వం పరబ్రహ్మ యత్‌ లోకానుగ్రహ విగ్రహస్య జగతాం నాథస్య తస్యామరాః రుక్మిణ్యాస్సతతం వివాహసమయే కుర్వంతు తే మంగళమ్‌॥ సులగ్నే సావధాన।	39
శ్లో.	గంగాద్యాః సరితో గ్రహాశ్చ శుభదాగంధర్వవిద్యాధరా దిక్పాలాఋషయశ్చ దేవమునయోదేవ్యశ్చ గౌర్యాదయః శ్రీవత్సాంకితవక్షసస్సుమనసాగ్రేసరస్య ప్రభోః రుక్మిణ్యాస్సతతం వివాహసమయే కుర్వంతు తే మంగళమ్‌॥ సులగ్నే సావధాన।	40
శ్లో.	యో గోపీనయనోత్పలైరనుపమైరారాధితో గోకులే గోభి ర్గోపసుతై రనేక మునిభిర్హృత్పద్మకోశాంతరే మాయామానుష విగ్రహస్య మరుతస్తే వాలఖిల్యాదయో రుక్మిణ్యాస్సతతం వివాహసమయే కుర్వంతు తే మంగళమ్‌॥ సులగ్నే సావధాన।	41
శ్లో.	బ్రహ్మవిష్ణు రుమాపతి శ్శ్రుతిచయోవాణీరమోమాయుతా ఆదిత్యా వసవోగణాధిపముఖా రుద్రాశ్చ భద్రప్రదాః కాలాంభోధర దివ్యకాంతి విలసత్కా యస్య మాయావినో రుక్మిణ్యాస్సతతం వివాహసమయే కుర్వంతు తే మంగళమ్‌॥ సులగ్నే సావధాన।	42
శ్లో.	వంశీనాద వినోదనందితసునందాద్యోఽనవద్యో మహా\న్‌ నందాద్యైరభిపూజితః పరమయా భక్త్యా ముహుర్లాలితః యః పూర్వం కమలేక్షణస్య కమలానాథస్య తస్యామరాః రుక్మిణ్యాస్సతతం వివాహసమయే కుర్వంతు తే మంగళమ్‌॥ సులగ్నే సావధాన।	43
శ్లో.	విద్యుత్పుంజనిభాంబరస్య విలసద్గ్రైవేయకస్య ప్రభోః ముక్తాహారమహార్హ కౌస్తుభమణిగ్రీవస్య కృష్ణాత్మనః పూర్ణేందు ప్రతిమాననస్య సుతరాం పూర్ణస్యభక్త్యాఽమరాః రుక్మిణ్యాస్సతతం వివాహసమయే కుర్వంతు తే మంగళమ్‌॥ సులగ్నే సావధాన।	44
శ్లో.	మీనాంకాధిక సుందర స్సురవధూదృక్చాతకాంభోధరో గోపీమండలమండనాంచిత తనుర్యస్సుందరః పూరుషః తస్యాఖండసుఖాత్మకస్య విదుషా మేకాత్మకస్య ప్రభోః రుక్మిణ్యాస్సతతం వివాహసమయే కుర్వంతు తే మంగళమ్‌॥ సులగ్నే సావధాన।	45
శ్లో.	యే సత్యం ప్రవదంతి సర్వభువనే యా ధర్మలీలాః స్త్రియః పాతివ్రత్యపరాయణాస్సురభయోమందారముఖ్యద్రుమాః తే సర్వే యదునాయకస్య మహత స్సర్వాత్మకస్య ప్రభోః రుక్మిణ్యాస్సతతం వివాహసమయే కుర్వంతు తే మంగళమ్‌॥ సులగ్నే సావధాన।	46
శ్లో.	గర్గాద్యైర్మునిభిస్సదామితమహాశీర్వాదవర్మాంచితో దేవైర్వ్యోమ్ని విమానమధ్యకలితైర్దత్త ప్రసూనాంజలిః సంతుష్టామరసమ్యగాచరితభేరీనాదసంతుష్టవా\న్‌ రుక్మిణ్యాస్సతతం వివాహసమయే కుర్వంతు తే మంగళమ్‌॥ సులగ్నే సావధాన।	47

కీర్తన

శంకరాభరణం - ఆట
పల్లవి:	శ్రీవాసుదేవప్రభో	పాలయమామ్‌॥
చరణ (1):	సకలహితకర సరసగుణగణ	నిగమ సరసిజనియత రసఘన
	విగతభవభయ వినుతసురవర	గగన సువిమల గరుడ విహరణ॥
చరణ (2):	సరసిజోదరచరణవిలసిత	సరసనూపుర సాధుహితకర
	తరళకుండల తాండవానన	మురరిపో ఖలమోహనాభవ॥
చరణ (3):	నిరుపమమధ్వనినికరపావన	మురళికారవమోహితాఖిల
	సురవధూగణ సుందరానన	కరివరానన కాంచనాంబర॥
చరణ (4):	దివ్యమంగళ గోపవేష	దీనపాలన వీతదోష
	నవ్యతర నవనీత రసిక	నరసఖానఘ నిఖిలజనక॥
చరణ (5):	దేవకీవసుదేవతనయ	దేవరాజ విరచిత వినయ
	దేవ నారాయణానంద	తీర్థ విరచిత దివ్యగీత॥

12.11

కీర్తన

కల్యాణి - ఆట
పల్లవి:	కల్యాణం భవతు సదా	కనకాంబర కనకాభే భైష్మి॥
చరణ (1):	అవలోకయ భైష్మీవదనం	భువనసుందర భూశశినం
	నవనీతప్రియవదనం భైష్మి	భవభయతారక మతిశుభదమ్‌॥
చరణ (2):	సంకల్పం కురుకంసరిపో జయ	సత్యం ప్రతిధర్మాచరణం
	పంకేరుహనయనామరనరపతి	పరిషది భైష్మాసహ శ్రీకృష్ణ॥
చరణ (3):	భ్రూమధ్యం పరిసమ్మృజ్యాచ్యుత	భూషయ భైష్మీ వదనమిహ
	కామం యుగనిహితాంగుళిమేనాం	స్నపయహరే భైష్మీ మధునా॥
చరణ (4):	నవ్యసుందర పరిధానే నానఘ	దేవీ మధునాచ్ఛాదయ
	దివ్యకనకమణిమంగళసూత్రం	దేవీకంఠే స్థాపయ భో॥
చరణ (5):	ద్వారవతీ నగరీ తవ సుఖదా	ధీర హరే రమయా భవతు
	కారణ నిర్భర జగతా మసుర వి	దారణ నారాయణతీర్థశరణా॥

12.12

శ్లో.

భైష్మ్యాః పాణిసరోరుహహాంజలిగతా రక్తాస్తు ముక్తాః స్థితాః
యా ముక్తాగళితానురాగవిమలాః కృష్ణోత్తమాంగాశ్రయాః
యాతా స్తస్య యదూద్వహస్య పరమంసామ్యం విశుద్ధాత్మనః
తాః కుర్వంత్వభితశ్శుభాని సతతం శ్రీకృష్ణవైవాహికాః॥

కీర్తన

పున్నాగవరాళి - రూపక
పల్లవి:	రుక్మిణీ కల్యాణం	సదా దృశ్యతామ్‌॥
చరణ (1):	కల్యాణగోపాలం	కరుణాలవాలం
	మాల్యాలంకృత మీడే	మదనగోపాలమ్‌॥
చరణ (2):	అమరనారీగీతం	ఆగమవిదితం
	అమితభాగ్యోపేత	మాశ్రయేఽనంతమ్‌॥
చరణ (3):	సత్యకామాదిగుణం	సకలజగత్కారణం
	భృత్యసంరక్షణం	భవబంధమోక్షణమ్‌॥
చరణ (4):	మురళీసరళగానం	మునిబృందాధీనం
	శరణాగతపాలనం	శరదిందువదనమ్‌॥
చరణ (5):	భవతిమిరఘనభానుం	భక్తకామధేనుం
	శివనారాయణతీర్థ	శీఘ్రఫలదానమ్‌॥

12.13

కీర్తన

ఆరభి(శంకరాభరణం) - ఆది(ధవళ)
పల్లవి:	జయ జయ బాలగోపాల	జయ జయ మదనగోపాల
	జయ జయ విజయగోపాల	జయ జయ కల్యాణగోపాల॥
చరణ (1):	నిరుపమగుణరత్నాకాశ	నిర్మలకీర్తిపూరితాశ
	శరనిధిమధ్యనివేశ	సారసనేత్ర లక్ష్మీశ॥
చరణ (2):	బ్రహ్మాదిసురపూజ్యపాద	పాతకజాలవిభేద
	బ్రహ్మణ్యదేవ ధృతవేద	బలభద్రావరజ భక్తవరద॥
చరణ (3):	పరిజనహృదయప్రభావ	పరిచితమురళీరావ
	చరితపుణ్యైకసేవ	శివనారాయణతీర్థదేవ॥

12.14

శ్లో.	బ్రహ్మగ్రంథిం విధాయాగ్నిం ప్రతిష్ఠాపయ కేశవ కృత్వా సప్తపదం కర్మ ప్రధానం హోమ మాచర॥	49
శ్లో.	లాజహోమం తతః కృత్వా ప్రవేశం హోమమాచర గంధర్వపూజాం కృత్వాఽథ స్థాలీపాకం సమాచర॥	50
శ్లో.	భుక్త్వాఽద్య బంధుభిస్సార్ధం భక్ష్యం పాయసముత్తమం శేషహోమం కురు స్వామి\న్‌ తతో నాగబలిం కురు॥	51
శ్లో.	పుష్పశయ్యాసమారూఢో రుక్మిణ్యా రమయా సహ భుంక్ష్వాఽఖండసుఖం సత్యం భూమాఖ్యం కృష్ణ కేవలమ్‌॥	52

కీర్తన

కేదారగౌళ - ఆది
చరణ (1):	బ్రహ్మగ్రంథిం కురు కృష్ణ త్వం
	పరిహర మాయాకృతబంధం
	బ్రహ్మసభాయామిహ వైవాహిక
	పావక మిహ సంస్థాపయ భో॥
చరణ (2):	గురుపదస్త్వం తవ మాయాకృత
	సప్తపదాఖ్యం విహతం కర్మ
	కౢప్తం తత్ర ప్రధానహోమం
	కృష్ణ కురు త్వం కృతకృత్యోఽసి॥
చరణ (3):	లాజహోమమథ కురు కృష్ణ త్వం
	లక్షణలక్షిత మిహ లక్ష్మ్యా
	శ్రీజానేఽథ ప్రవేశహోమం
	శ్రేయస్కర మాచర కృష్ణ॥
చరణ (4):	గంధర్వం సంపూజ్య చ విధినా
	గరుడధ్వజకేశవకృష్ణ
	కురు విధినా స్థాలీపాకాఖ్యం
	కర్మ చ కరుణారసజలధే॥
చరణ (5):	ఇష్టతమం పాయసమతిమృష్టం
	పిష్టకమతిసంతుష్టమనా
	ఇష్టజన్నైస్సహ భుంక్ష్వ యథేష్టం
	తుష్టిం పుష్టిం కురు జగతాం భో॥
చరణ (6):	శేషశయన లీలామయవిగ్రహ
	శేషహవనమిహ కురు కృష్ణ
	దోషరహిత కురు నాగబలిం భువి
	భూషయ భైష్మీమిహభూమన్‌॥
చరణ (7):	లక్షణశయ్యా మధిరూఢస్త్వం
	లక్ష్మ్యాసహభవ ధనపాలిన్యా
	అక్షయసుఖమనుభవనిగమాంత
	ర్లక్షణసంబోధితమమలమ్‌॥
చరణ (8):	శ్రీకల్యాణగోపాలక
	రుక్మిణ్యాః కల్యాణమిదం
	శ్రీకర మిహ నారాయణతీర్థ
	ప్రకటితమితి యతివరసుఖదమ్‌॥

12.15

శ్లో.	ఆచార్యవచనాత్సర్వ మకరో ద్యదునందనః వాచామగోచరాత్మాఽపి వాసుదేవస్స్వమాయయా॥	53
శ్లో.	భైష్మీ జాంబవతీ భామా సత్యా భద్రాచ లక్షణా కాళిందీ మిత్రవందా చ మహిష్యోష్టాభవ\న్‌ హరేః॥	54
శ్లో.	ద్వారకానగరీమధ్యే సహస్ర స్తంభమంటపే రత్నసింహాసనారూఢం సకళత్రం జగు స్సురాః॥	55

కీర్తన

కాంభోజి - ఆది
పల్లవి:	ఆలోకయే రుక్మిణీ	కల్యాణగోపాలమ్‌॥
అనుపల్లవి:	నీలమేఘనిభాకారం	బాలార్క సమానచేలం
	నీలాంబరానుజం గో	పాలం నీలాలకాంతమ్‌॥
చరణ (1):	ద్వారకాపురమంటపే	ద్వాదశాదిత్యసన్నిభే
	భూరిరత్నసింహాసనే	భూసురఘనే
	వీరాసనే సమాసీనం	వికసితాంబుజాననం
	ధీరయోగిసేవ్యమానం	దేవకీవసుదేవసూనుమ్‌॥
చరణ (2):	శంఖదుందుభినాదితే	శతశోగంధర్వాదిగీతే
	పుంఖానుపుంఖ నిగమ	బుధజనావృతే
	పంకజేక్షణరంభాది	పటునటనవినోదితే
	కుంకుమకేసరవర్షితే	కోమలాకారచరితే॥
చరణ (3):	దివ్యకిరీటకుండల	దీప్తపీతాంబరధరం
	నవ్యముక్తామణిహారం	నానావిహారం
	అవ్యయభూతివిస్తారం	అమరనారీసురాధారం
	భవ్యకౌస్తుభకంధరం	భక్తమానససంచారమ్‌॥
చరణ (4):	అష్టమహిషీసమేతం	అమరనారీసుసేవితం
	తుష్టపుష్టజనావృతం	తుంబురుగీతం
	ఇష్టజనసమాశ్రితం	ఈశ్వరమపరాజితం
	దృష్టసర్వలోకజాతం	దేవరాజాదివినుతమ్‌॥
చరణ (5):	హేమముక్తామణిఛత్రం	హీరరత్నకటిసూత్రం
	చామరవ్యంజనావృతం	శరదిందువక్త్రం
	కామకోటిసమగాత్రం	కనకాంగదాదివిచిత్రం
	శ్యామసుందరం పవిత్రం	శరణాగతోద్ధారగోత్రమ్‌॥
చరణ (6):	చంద్రానన భైష్మీ భామా	జాంబవతీ సత్యా మిత్రం
	విందా భద్రా లక్షణా కా	ళిందీనాయకం
	నందనందనమాశ్రిత	బృందబృందారకవంద్యం
	నందితనారాయణతీర్థ	నందద మానందకందమ్‌॥

12.16

శ్లో.	శ్రీగోపాలఘనాదపారకరుణాపీయూషధారా సృతా యా నారాయణతీర్థభూధర పరిక్షిప్తా సమస్తా తదా సంభూయాచ్యుత భక్తభూమిషు వహంత్యానందయంతీ జగత్‌ పావిత్ర్యం విధునోతు కృష్ణవిలసల్లీలాతరంగిణ్యసౌ॥	56
శ్లో.	కామదా కామినామేషా ముముక్షూణాం చ మోక్షదా శృణ్వతాం గాయతాం భక్త్యా కృష్ణలీలాతరంగిణీ॥	57
ఇతి శ్రీనారాయణతీర్థవిరచితాయాం శ్రీకృష్ణలీలాతరంగిణ్యాం శ్రీకృష్ణరుక్మిణీకల్యాణమహోత్సవవర్ణనంనామ ద్వాదశ తరంగః.