ఆంధ్రభారతి - తూము నరసింహదాసు కీర్తనలు

నాదనామక్రియ - ఆది

పల్లవి:

నిను నమ్మియున్నవాడను
నిను నమ్మియున్నవాడ నీరేజదళనేత్ర
చనువిచ్చి మాటాడవు సామి నానేర మేమి

చరణము(లు):

ఘనమయిన తాపత్రయము దినదినము యేచగానే
వినయముతోడ దెల్ప వినన ట్లున్నా విదేమి

శరణాగతుడైన మీ మరుపు జొచ్చిన నన్ను
వెరవకుమని ప్రోచు విధము జూపవదేమి

నగుమోము జూపి నేడు నాతో మాటాడవేమి
పగవాడనా నీకు తగునా జాగేల నయయో

మొఱుగు తెర గదేమనవు బిరుదు పేదరికమా నా
తరమా నీదయ రాకున్న దరి జేర నయయో

భారము నీదనుచు పరుల వేడగబోక
కోరినప్రాపు దాపు జేరియున్నాడ సామి

గరిమతోడుత తూము నరసింహదాసునకు
గురిగా ప్రాపైనాడవని ని న్నరసి సేవించినాడ