ఆంధ్రభారతి - త్యాగరాజ కీర్తనలు - మా రామచంద్రునికి జయమంగళం

కేదారగౌల - ఆది

మా రామచంద్రునికి జయమంగళం ॥మా॥

ఘోరభవవరనిధి తారకునికి మంగళం ॥మా॥

మారునిగన్న రాజ కు - మారునికి మంగళం

మారులేని హరికి ము - మ్మారు జయమంగళం ॥మా॥

బాహులే యాప్తునికి సు - బాహువైరికి మంగళం

బాహుజాశూరుని కాజాను - బాహునికి మంగళం ॥మా॥

బృందావనస్థిరమౌని - బృందావనునికి మంగళం

బృందాలోలునికి పాలిత - బృందారకునికి మంగళం ॥మా॥

రాజవేషునికి రాజ - రాజార్చితునికి మంగళం

రాజధరుడగు త్యాగ - రాజ నుతునికి మంగళం ॥మా॥