ఉత్తరరామాయణము - కుంభకర్ణునకు నిద్రింప దశగ్రీవుం డొక యిల్లు గట్టించుట - ఆంధ్రభారతి

కుంభకర్ణునకు నిద్రింప దశగ్రీవుం డొక యిల్లు గట్టించుట

చం.	విను మటుమీఁద బ్రహ్మ యొదవించిన నిద్దురమబ్బు కుంభక ర్ణుని మొగమాని జాగ్రదవరోధ మొనర్చినఁ బవ్వళింపఁగాఁ దనకొక యిల్లు గావలయు దానవనాయక! యంచు నన్నతో ననుటయు నాతఁ డప్పనికి నప్పుడ పంచె ననేకశిల్పులన్‌	292
వ.	వారును దదాజ్ఞ శిరంబున ధరియించి తత్‌క్షణంబ	293
సీ.	చికిలి ప్రాఁగెంపు టిట్టికల గోడలు వెట్టి - వజ్రంపు గారలపనులొనర్చి మూలఱారాకంబములు పెక్కు జతసేసి - జాళువాప్రతిమల చాలొనర్చి తులకించు పవడంపు దూలముల్‌ పయినుంచి - పచ్చఱాపలకలు పాదుకొల్పి పులుదిండిఱా మొత్తముల లోవ లమరించి - స్ఫటికసోపానముల్‌ సంఘటించి
గీ.	పుష్యరాగ వితర్దికల్‌ భూరిచంద్ర కాంతజగతులు గోమేధికపుఁ దలుపులు కళుకు ముత్యాల సోరణగండ్లు వేడ్క సేయఁ బడకిల్లు గట్టి రా శిల్పివరులు	294
కం.	ఆమడనర వెడలుపు మూఁ డామడ నిడివియును గలిగి యతిరమ్యంబై రామ! ఘటకర్ణు పటుని ద్రామందిర మలరు మృదుతల్పతతులతోన్‌	295
వ.	అటుల ధవళప్రభాపహసిత కైలాసంబగు తన్నివాసంబున	296
సీ.	కిన్నరాదులఁ గిట్టి గెలుచునందోళంబు - మించఁ బల్మఱుఁ గల్వరించుకొనుచు దిక్కరుల్‌ సెవుడొంద దేవతల్‌ వెఱసెంద - బెట్టుగా గుఱకలు వెట్టుకొనుచుఁ గలలోన దిక్పాలకులమీఁదఁ జని మాఱు - కొనువారిఁ గని పండ్లుగొఱికికొనుచు సెలవుల లాలచిప్పిల నప్పటప్పటి - కించుకించుక చప్పరించుకొనుచు
గీ.	మరలుచును బొర్లుచును మేనుమఱచి మిగులఁ జెమ్మటల దొప్పఁదోఁగుచు నిమ్మళించు నిబిడతామస సుఖమిచ్చు నిద్రఁ గలిసి కాలముఁ గ్రమించె నక్కుంభకర్ణుఁ డధిప!	297