శ్రీమహాభారతము - శాంతిపర్వము - తృతీయాశ్వాసము - కణికుఁడు శత్రుంజయున కుపదేశించిన హితవచనముల ప్రకారము - కవిత్రయ భారతము - కవిత్రయము - నన్నయ - తిక్కన - ఎఱ్ఱన - ఆంధ్రమహాభారతము

కణికుఁడు శత్రుంజయున కుపదేశించిన హితవచనముల ప్రకారము (సం. 12-138-4)

వ.	అవ్వాక్యంబు లాదరింపవలయు నని పల్కి వెండియు భీష్ముండు పాండవాగ్రజుతో ‘సౌవీరపతి యగు శత్రుంజయునకు భారద్వాజ వంశవర్యుండైన కణికుం డుపదేశించిన హితవచనంబులు గలవు; వానిం జెప్పెద నాకర్ణింపు మని యిట్లనియె.	267
క.	వికచముఖుఁ డగుచు శాత్రవు \| లకు హితు లగునట్టి వారలం గని భూపా లకుఁ డెడ్డ కత్తెరయు నా \| లుక బెల్లమునై మనంబులుం గన వలయున్‌.	268
ఉ.	జ్ఞాతుల నమ్మి తోడుకొని శత్రుల నోర్చి యహీన రాజ్యముం బ్రీతి యెలర్పఁ జేకొనిన పిమ్మట సౌఖ్య సమృద్ధి తోషిత జ్ఞాతినికాయుఁడై మది నజస్రము నమ్మక సర్పసంయుతం బై తనరారు రమ్య నిలయంబున నున్నటు లుండగాఁ దగున్‌.’	269
వ.	అని మఱియును.	270
క.	‘వినుము తఱి వేచి రిపుమూఁ \| పున మోవఁగవలయు సమయముం గనికొని గ్ర క్కునఁ గడవ శిలాస్థలి వై \| చిన చాడ్పున నేర్పు మెఱయఁ జెఱుచుట యొప్పున్‌.	271
క.	పానము జూదము వేఁటయు \| మానినియును భూపతులకు మధుర వినోద స్థానము లగు నైనను దగ \| వైన విధము దక్కఁ దగుల మాపద దెచ్చున్‌.	272
క.	విని విననివాఁడ పోలెం, \| గని కానని వాఁడపోలెఁ గావలయు విభుం డొనరింపఁ దలంచిన పని \| కనువగు నంతకు నభేద్యుఁడై జనుల యెడన్‌.	273
క.	ఒల్లని కార్యం బాసల \| నల్లన కాలగతిఁ గడపునది కాలముచేఁ బెల్లొదవు విఘ్నములు భూ \| వల్లభునకు నెపము వెట్టవచ్చుం బిదపన్‌.	274
తే.	బహుళ మగు గర్వమునఁ గార్యభంగియును న \| కార్యసరణియు నెఱుఁగక నార్యవృత్తిఁ గాని తెరువున నడచుచున్నేని గురుని \| నైన శాసింపఁగాఁ దగునండ్రు బుధులు.	275
క.	తెగఁ దీర్పక తగ నార్పక \| తెగటార్పక కడమ కొంత ద్రిక్కఁగ నున్నన్‌ జగతీశ! యప్పునగ్నియుఁ \| బగయును గడుఁ బెరుఁగుఁ గీడు వాటిల్లు దుదిన్‌.	276
ఆ.	మార్దవమున మృదువు మర్దింపగా వచ్చు \| మార్దవమున పర విమర్దనంబుఁ జెల్లు మార్దవమునఁ జెల్లనియది లేదు \| గాన మృదువ తలఁప ఖరము సువ్వె.	277
వ.	అనిన విని యజాతశత్రుండు ‘ధర్మంబు నడవక యవగ్రహాది దురితంబులు దుస్తరంబు లయిన నాహారంబులు దొరకొనని యట్టిచో ద్విజాతు లేమిభంగిం బ్రాణంబులు రక్షించుకొను వా?’ రనుటయు నాపగానందనుండు ‘విశ్వామిత్ర చండాల సంవాదం బను నితిహాసంబు భవత్ప్రశ్నంబునకు నుత్తరంబై యుండు; నాకర్ణింపు’ మని యిట్లనియె.	278