శ్రీమహాభారతము - శాంతిపర్వము - షష్ఠాశ్వాసము - జనకుఁడు శుకున కుపదేశించిన మోక్షధర్మ ప్రకారము: - కవిత్రయ భారతము - కవిత్రయము - నన్నయ - తిక్కన - ఎఱ్ఱన - ఆంధ్రమహాభారతము

జనకుఁడు శుకున కుపదేశించిన మోక్షధర్మ ప్రకారము: (సం. 12-313-9)

సీ.	‘విను ముపనీతుఁడై విప్రుండు బ్రహ్మచ \| ర్యంబు వేదాభ్యసనంబు నడపి దారసంగ్రహము సంతానసంపాదనం \| బును నధ్వరక్రియయును నొనర్చి దేవపిత్రతిథిపూజా విధిపరుఁడగు \| చుండి వనమునకు హుతవహప్ర యుతముగఁ జని యందు నతిథులఁ గొనియాడి \| వ్రతము గషాయపక్వత నొనర్ప
తే.	నగ్నులాత్మయంద యారోపితములుగఁ \| జేసి వీతరాగ చిత్తవృత్తిఁ బరమశాంతిఁ బొంది బ్రహ్మాశ్రమపదంబుఁ \| బొందువాఁడు లోకపూజ్యచరిత!’	272
వ.	అనిన విని యమ్మునివరుండు.	273
క.	‘జ్ఞానోదయమైయుండఁగ \| మానక వెండియును నాశ్రమత్రయవాసుం డై నిలిచి తత్క్రియాను \| ష్ఠానము గ్రమవృత్తి నడపుటయు వలయు నొకో?	274
తే.	జ్ఞానవిజ్ఞాన దృష్టి శాశ్వతిక తత్త్వుఁ \| డయ్యెనేనియు విడువరా దాశ్రమముల క్రమ సమారూఢి యనునె వేదములు? దీనిఁ \| దెలియఁజెప్పవె మోక్షవిత్తిలకజన్మ .’	275
వ.	అనవుడు నతం డతని కిట్లనియె.	276
తే.	జ్ఞానవిజ్ఞానములు మోక్షసాధనములు \| గురుని యుపదేశమున నవి దొరకొనంగ వాన మోక్షంబు గాంచినవాఁడు విడుచు \| నయ్యుపాయద్వయమ్మును నతులబుద్ధి.	277
క.	లోకోచ్ఛేదముఁ గర్మ \| వ్యాకులతయుఁగాక యుండవలయుటకై సు శ్లోకా! చతురాశ్రమములు \| గైకొని నడిపిరి దృఢంబుగాఁ బూర్వమునుల్‌.	278
తే.	అందుఁ దుదముట్ట నడచిన నందవచ్చు \| ముక్తి బహుజన్మ సంసిద్ధమోక్షకార ణముల శుద్ధుఁడై ప్రథమాశ్రమమునయంద \| కాంచు మోక్ష మెందేని నొక్కరుఁడు మునిప!	279
క.	వానికి మూఁడాశ్రమముల \| లో నిలువఁ బ్రయోజనంబులుం గలవె? తమోఽ ధీనతను రజఃపరత \| న్మానవలయుఁ గాక? సత్త్వనైష్ఠికమతియై.	280
తే.	సత్త్వమార్గాభిరతి యాత్మతత్త్వదర్శ \| నంబు గావింపఁ దనుఁ దాన నరుఁడు గాంచు విశ్వమునఁ దానుఁ దనయందు విశ్వమును వ \| సించుటయుఁ జూచుచును ముక్తిఁ జెందియుండు.	281
వ.	ఇవ్విషయంబున యయాతి వాక్యంబులు గల వాకర్ణింపుము.	282
ఆ.	జ్యోతి యాత్మయంద యున్నది కాన శ \| క్యము సమాహితాత్ముఁడైన మునికి నొరులవలనఁ దనకు నొరులకుఁ దన దెస \| భయము లేకయున్నఁ బరముఁ గాంచు.	283
క.	కోరికయు నొల్లమియు లే \| కే రూపున భూతములకు నెగ్గగు తెఱఁగుం జేరక యకామవృత్తిఁ ద \| పోరతి నున్నతఁడు బ్రహ్మముం బ్రాపించున్‌.	284
క.	వినఁ జూడం బడు నం దె \| ల్లను సమతం బరముఁ గనుచు లౌల్యనిరసనం బున సుఖదుఃఖాదిద్వం \| ద్వనిరూఢుఁడు గాక యున్నతఁడు ముక్తిఁ గనున్‌.	285
క.	ఇనుమును గనకము నిందయు \| వినుతియు సమములుగఁ గొనుచు వివిధాంగకముల్‌ దనలోన నడఁచు కమఠము \| ననువున నింద్రియము లడఁచునతఁడు గను శివున్‌.’	286
వ.	అని చెప్పి.	287
తే.	అవ్విశేషంబు లెల్ల నీయందుఁ గలుగు \| టనఘ! భవదీయ జనకదయాసమృద్ధి సిద్ధ దివ్యబోధంబునఁ జేసి తోఁచె \| నవ్విధముకంటె నీ చంద మధికతరము.	288
క.	నీ వట్టిఁడ వగు టెఱుఁగవు \| భావంబున సంశయమును భయమును బాల్యం బావేశింపఁగఁ జేయ న \| భావితనిశ్చయుఁడ వగుటఁ బరముమునీంద్రా!	289
క.	జ్ఞానము విజ్ఞానము నీ \| మానిత గుణము లగు నవి సమగ్రములైనం గానేరదు మోక్షపదము \| గానుపు - దృఢనిశ్చయుండు గాకున్నేనిన్‌.	290
తే.	ఒక్క కొఱఁతయు లేదు నీ వుదితమోక్ష \| బోధుఁడవు సంశయములెల్లఁ బోవవిడిచి నిశ్చయింపుము నీ కన్న నెలవు శాశ్వ \| తంపు నెలవుగ విషయావికంపితాత్మ!’	291