ఆంధ్రభారతి - క్షేత్రయ్య మువ్వ గోపాల పదములు - ఎందుదాచుకొందు నిన్ను

కల్యాణి - రూపక

(నాయిక: స్వీయ - స్వాధీనపతిక)

పల్లవి:

ఎందుదాచుకొందు నిన్ను - నేమి సేతు నేను

అను పల్లవి:

అందమైన నీ మోము - అయ్యారే ముద్దుగుల్కుచున్నది ఎందు..

చరణము(లు):

అందిందు తిరుగకురా - అతివలు నీ తోడి
పొందుగోరియే వేళ - పొగరుచున్నారు
ఎందఱెందఱని కాతు - నెంతని నే విన్నవింతు
పందెమాడు కొన్నారట! - పట్టుక పోయెద మనుచు ఎందు..

పలుమాఱు నా సామి - బయటకు వెళ్ళకు మ్రొక్కెను
నిలుపరాని మోహమున - నిన్ను జూచి చెలులు
అలరు నీ మోవి తేనె - యూని చప్పరించవలసి
కులుకు గుబ్బల ఱొమ్ము - గ్రుమ్మి పొయ్యెద మనుచు ఎందు..

మదముతో నా ముద్దు - మువ్వగోపాల నా సామి
గుదిగొన్న తమకమున - గూడి యిద్దరము
నిదుర పరవశమున - వదలునో కౌగిళ్ళు
పదిలముగ నా జడను - బట్టి కట్టుకొందునా ఎందు..