ఆంధ్రభారతి - క్షేత్రయ్య మువ్వ గోపాల పదములు - తెలిసి తెలియలేక

మధ్యమావతి - ఆది

(నాయిక: స్వీయ - స్వాధీనపతిక)

పల్లవి:

తెలిసి తెలియలేక - పలికేరు చెలులు

అను పల్లవి:

కలిసియున్న నా సామిపై - గాక సేయ వశమా? తెలిసి..

చరణము(లు):

చలయేటి తమ బు - ద్దులు వినలేదని
యలిగి రేమి సేతు - నతివలెల్ల?
చెలువుని ముద్దమా - టలు నా వీనుల నుండి
తొలుకుచున్నవి తమ మా - టలకు చోటున్నదా? తెలిసి..

కొనగంట దముగను - గొన దింతైనాగాని
నెనరులేని దాయెనంచు - నిందించేరు
ఘనమైన సామిరూపు - కనులు నిండియుండగ
కనకాంగి! యితరులు - కానవత్తురటవే? తెలిసి..

నా పాల గల మువ్వ - గోపాలసామితో
కోపించుకొమ్మని - కొమ్మలనేరు
ఏ ప్రొద్దు నా సామి - యెద నిండి యుండగ
పాప మింతేగాని - కోపమున కిమ్మున్నదో? తెలిసి..