ఆంధ్రభారతి - క్షేత్రయ్య మువ్వ గోపాల పదములు - సామికి సరియెవ్వరే? నాచక్కని క్షేత్రయ్య పదములు

ముఖారి - ఆది

(నాయిక: సామాన్య - స్వాధీనపతిక)

పల్లవి:

సామికి సరియెవ్వరే? నాచక్కని

అను పల్లవి:

భామరో! తిరువళ్ళూరి వీర రాఘవ! సామి..

చరణము(లు):

నెలతరో! ఎప్పుడైన - నేనే చెక్కిలి జీరి
కలగి యెరుక లేకయే - చెలియ జీరెనంట!
తెలుసు కొమ్మనుగాని - యలగి మారు బలకక
చలియించని నిండు కుండ - వలె నుండునమ్మ! సామి..

కదసి నేనే వాని మోవి - గంటిచేసి మరపున
పదిరి యీలాగుననే - పడతి యుంచె నందున!
అదరిన? కోపగించిన? - అలసిన? సొలసిన?
మదిరాక్షి! నాచిత్తము స - మ్మతి బరచునమ్మ సామి..

భామరో మా మువ్వ గో - పాలుడౌ వీర రాఘవుడు
కామకేళి హొయలుగ - గలసి యుండగ
ఏమగువ వద్దనైన - ఈలాగుందువో యంటె
ఈ మాటెట్లంటివని - ఎంతో యుస్సురనెనమ్మ! సామి..