కవితలు బసవరాజు అప్పారావు గీతాలు 115. భూదేవి
115. భూదేవి
అమ్మా వో భూదేవీ!
నమ్మితిమమ్మా నిన్నే!            అమ్మా...
    నీరు పేరు చెపితె గుండె
    నీరయిపోయే నమ్మా
    నిప్పు పేరు చెపితే ప్రాణి
    గుప్పునెగిరి పోనమ్మా!            అమ్మా...
గాలి పేరు చెపితె మాకు
కాలుసేతు లాడవమ్మ
ఆకాశమ్మంటే మా
కసలే భయ మౌనమ్మా!        అమ్మా...
    కొండకోనలయినగాని
    ఘోరారణ్యాలుగాని
    మేడలైనగాని చెట్ల
    నీడలే నెడారిగాని            అమ్మా...
తల్లి పక్కలోన చిన్ని
పిల్లలు బజ్జున్నలాగు
నిన్ను నమ్మి నిబ్బరముగ
నిద్దురబోయేమమ్మా!
    అమ్మా వో భూదేవీ!
    నమ్మితిమమ్మా నిన్నే!
AndhraBharati AMdhra bhArati - kavitalu - basavarAju appArAvu gItAlu - 115. bhUdEvi - basavarAju appArAvu geetaalu - Basavaraju Appa Rao - Basavaraju Apparao geeyamulu gEyAlu geeyaalu geeyAlu paatalu pATalu - telugu kavitalu - tenugu andhra ( telugu andhra andhrabharati )