దాశరథుల బాలక్రీడలు - ఆంధ్రభారతి - రంగనాథరామాయణము - గోన బుద్ధారెడ్డి - బాలకాండము దాశరథుల బాలక్రీడలు

దాశరథుల బాలక్రీడలు

కల్లరినగవులఁగన్నులు దెఱచి,
యల్లనల్లనఁదప్పుటడుగులు వెట్టి,
మల్లడిగొను త్రొక్కుమాటలు నేర్చి,
యెల్లవారికిఁ ¹⁵⁸జాల నింపులొనర్చి,
కొద్దిగా ముత్తెంపు ¹⁵⁹గొనబువజ్రాల
మద్దికాయలడాలు మలయఁజెక్కిళ్లఁ,
బ్రాకటంబుగ ఫాలబాలేందు కళల
శ్రీకరాకృతి రావిరేకలల్లాడఁ,
బొగడొందు మగరాలపులిగోళ్లగొలుసు
జిగి డెందములయందుఁ జిందులుద్రొక్క,
నెడనెడ బలుపచ్చలే యడ్డి ¹⁶⁰గలుగఁ
గడునొప్పు మొలనూళ్లగంటలు ¹⁶¹మొరయ,
మువ్వలందెలు పదంబుల రొదల్‌ సేయ,
నవ్వు ¹⁶²లాటల బాల్యనటన లేర్పడఁగ,
విద్దెలు నెఱపుచు విభునిముందఱను,
ముద్దులు గులుకుచు మోహనాకృతుల
నంత నా నలువురు నభివృద్ధినొంది
సంతతపుణ్యులు సమసత్త్వు లగుచుఁ
దమలోనఁ గవగూడి దశరథాత్మజులు
రమణీయమూర్తులు రామలక్ష్మణులు
భరతశత్రుఘ్నులు పాయక పుణ్య
నిరతులై చౌలోపనీతులై ప్రీతి
నఖిలవేదంబులు నఖిలశాస్త్రములు
నఖిలశస్త్రాస్త్రవిద్యలు నేర్చి. రంత
వారిలో రాముఁడవార్యశౌర్యమున
సారవివేకాది సద్గుణావళులఁ
దేజరిల్లుచు విష్ణుదేవుండు గాన
రాజిల్లె; నా దశరథుఁడును నంతఁ

↑జూడ

↑ఁగొనలప్రాఁగెంపు

↑గలును

↑మెఱయ

↑మా(టా)టల