నతనికిఁబ్రియభార్య లతిరూపవతులు
సతులిద్దఱుకుఁ బుత్త్రసంతతి లేమి
నంతట నా రాజు నఖిలసన్మునుల
సంతతి కొఱకునై సరగ రప్పించి
యా మహాత్ములకును నర్ఘ్యపాద్యములు
ప్రేమతోఁదగనిచ్చి ప్రియవాక్యములను
ఘనులార! నన్నును గరుణించి మీరు
దనయుల నాకును దయసేయవలయు
నని విన్నవించిన నా రాజునకును
ననువొంద నమ్మును లపు డిట్టులనిరి
ఐంద్రయాగముసేయు మవనీశ! భక్తి
సాంద్రంబుగాఁబుత్త్రసంతతి గలుగు
నన జన్నమున కప్పు డఖిలవస్తువుల
ననువొందఁ దెప్పించె నా క్షణంబునను
నైంద్రయాగంబను నా మఖంబపుడు
సాంద్రానుమోదులై సంయమీశ్వరులు
పుత్త్రలాభంబుకై పొలుపొంద నంత
చిత్రయజ్ఞము దారు సేయంగ నందు
జలములు మంత్రించి జలకుంభములను
నలరార నియతిచే నటు దాఁచియుండ
ధరణీశుఁ డా రాత్రి దప్పితో నంత
మఱపొంది యా యజ్ఞమందిరమందు
గలశంబులో నీళ్లు గ్రక్కునఁద్రావ
జలహీనమగు కలశంబును జూచి
యెవరు ద్రావిరి జలంబెటుపోయె ననుచుఁ
బ్రవిలాత్ములు వారు భావనిరీక్ష
నరసి యా నృపతియే యా నీరు ద్రావు
టెఱిఁగి చోద్యంబంది యిది దైవమాయ
యని చూచుచుండఁగ నా నృపాలకుఁడు
ఘనమగు గర్భంబు గడువేగఁదాల్చె
గర్భ మంతటఁబడి కడుఁజోద్యమలర
నర్భకుండుదయించె నా రాజు చచ్చెఁ
గడఁగుచు ఋషులెల్లఁగడుదుఃఖమంది
సడలనియమ్మంత్రసామర్థ్యములను
బనివడి యువనాశ్వు బ్రతికించి రంత
ననుపమశుభమూర్తియై యుండె నతఁడు
వరుసతోడుతఁజక్రవర్తి చిహ్నంబు
లరుదార నుండెడి యా పుత్త్రుఁజూచి
యితఁ డేడు దీవులు నేలు నటంచుఁ
జతురత ఋషులెల్ల సంతోషపడిరి
అల యువనాశ్వుండు నా మౌనిజనుల
కెలమితో ధనరాసు లిచ్చినఁజనిరి
తల్లియే లేనికతంబున బాలుఁ
డల్లన నాఁకొని యట నేడ్చుచుండ
వరుస నా యింద్రుండు వచ్చి తానప్పు
డరయంగ నా శిశువాఁకలిదీరఁ
బెనుపొందఁగా నోరఁబెనువ్రేలు వేగ
నునిచిన నమృతంబు నొయ్యనఁద్రావ
సుధ గ్రోలుటయుఁజేసి శుభయుతుపేరు
బుధులతో మాంధాతభూమీశుఁడనుచు
నతనికి నామధేయంబటుచేసి
యతివేగమునఁ బోయె నా బిడౌజుండు
అంత నా మాంధాత యలపూర్ణచంద్రు
నంతటిప్రభతోడ నతిశయిల్లుచును
రూఢిగా యౌవనారూఢుఁడై యంత
గాఢశౌర్యస్ఫూర్తిఁ గడుఁదేజరిల్లి
రావణాదుల బహురణముల గెలిచి
భూవలయంబెల్లఁ బొందుగా నేలి
విష్ణునిభక్తుఁడై వెలసి యాగములు
జిష్ణుబలంబునఁజేయుచునుండె
నా రాజునకు విమలాంగి యన్‌ సతికి
భూరితేజోయుతుల్‌ పుత్త్రరత్నములు
నరయంగ ముచుకుందుఁ డా సుసంధియును
దరుణు లేఁబండ్రును దగ జనియింప
సుదతులప్రాయంబు సొరిది వచ్చినను
ముదమున సౌభరిమునిపతి కిచ్చె
నతివల కగ్రజుఁడగుముచుకుందుఁ
డతివేడ్క హరిభక్తుఁడై యేఁగె దివికి
నాతనిసోదరుం డా సుసంధియును
నాతత పుణ్యాత్ముఁడై భువినేలె
నతనికి ధ్రువసంధి..........
..........

యతిఘోరయుద్ధంబు నతులతఁజేసి
యతనినె యనిలోన హతుఁజేసి చనిరి
అంత నాతని సతులతి దుఃఖమంది
మంత్రుల రాజ్యంబు మఱి తీర్పనునిచి
మేలిమి నుండిరి మెలఁత లిద్దఱును
గాళిందియనుసతి గర్భమై యున్న
మేలోర్వలేక యా మెలఁతలందొకతె
చాలంగ సవతిమచ్చరమునఁజేసి
గర్భిణియైయున్న కాళింది కపుడు
..........

..........
నా విషమున గర్భమట వీడి పడక
తావేగి వేదనఁదల్లడం బంది
..........

యతిముదంబున నున్న యా శుభాంగికిని
సుతుఁడుదయించెను శుభముహూర్తమున

..........గాంచి కాళింది
గరముతో ముదమందెఁ గడుసంభ్రమమున
నాతండు శత్రుల నణఁచి రాజ్యంబు
చేతోముదంబునఁజేయుచునుండ