ఉత్తరరామాయణము - శ్రీరాముఁడు లక్ష్మణునకు నృగు వృత్తాంతము వచించుట - ఆంధ్రభారతి

శ్రీరాముఁడు లక్ష్మణునకు నృగు వృత్తాంతము వచించుట

చం.	నృగుఁ డను రాజు తొల్లి యతినిర్మలకీర్తియు బ్రాహ్మణ ప్రియుం డగణితవిక్రమోన్నతుఁ డహంకృతి శూన్యుఁడు సత్యవాది నాఁ బొగడిత కెక్కి రత్నమయ భూషణ భూషితలై సవత్సలై తగు బహుధేనులన్‌ దినము దానము సేయు మహీసురాళికిన్‌	357
చం.	అతఁడొక పుణ్యకాలమున నర్బుదసంఖ్యల మించు నైచికీ ప్రతతి సదక్షిణాకముగ బ్రాహ్మణకోటుల కిచ్చుచోట సు వ్రతుఁడగు నొక్క విప్రుని సవత్సక ధేను వనేకధేనుసం గతి నటురా నెఱుంగ కొక క్ష్మాసురుఁ బిల్చి నృపాలుఁడిచ్చినన్‌	358
కం.	దానముఁగొని యతఁ డేఁగిన ధేనువుఁగల విప్రుఁ డాత్మ ధేనువు నెందుం గానక, బహుదివసంబులు దీనుండై వెదకె నెల్లదేశములందున్‌	359
తే.గీ.	గోత్రఁ గల గోత్రలం దెల్ల గోవు వెదకి గాత్ర మలయంగ నతఁ డంతఁ గనఖలాఖ్య దేశమున కేఁగి యందొక్క ద్విజునియింట దూడతోనున్న తన ద్రోణదుఘను గాంచె	360
కం.	కాంచి యరుసించి శబలీ! యంచున్‌ బిలుచుటయు నొడయఁ డరుదెంచిన వాఁ డంచు నది దూడతోఁజను దెంచి తనువు మూర్కొనంగ ద్విజుఁడింపొందెన్‌	361
కం.	తన ధేనువు తనుఁజేరెను బనియే మెవ్వరికి ననుచుఁ బనివడి వెంటం జనుదెంచునావుఁ దోకొని చన దానము పట్టినట్టి క్ష్మాసురుఁ డలుకన్‌	362
మ.	తగునే నా యిలు సొచ్చి నా మొదవు నుద్దండముతోఁ గొంచుఁ బా ఱఁగఁ జోరత్వము గాక యిత్తెఱఁగు ధీరత్వంబె? యం చుద్ధతిన్‌ సిగ వీడన్‌ వెనుచక్కి పింజ వదలన్‌ జేపట్లకున్‌ వచ్చినన్‌ నగి, యా విప్రుఁడు వెఱ్ఱి! యన్యధనమైనన్‌ నేను గైకొందునే?	363
కం.	నా మొద విది నిక్కువముగ నే మందలఁగలసి తప్పి యిటఁజేరినదో? యీ మొదవుఁగానకయె యీ సీమంతయుఁ దిరిగి యలతఁ జెందితి ననినన్‌	364
ఉ.	ఇచ్చినయట్టిదాత నృగుఁ డీ మొదవున్‌ గయికొన్నవాఁడ నే నిచ్చటనే వచించెదవె యీ యనృతోక్తులు? రాజుచెంతకున్‌ జెచ్చెరరమ్ము చూత మని చేకొనినాతఁడు వల్కఁగాదనన్‌ వచ్చునె యట్టులైన? నని వచ్చె నతండును గోసమేతుఁడై	365
ఆ.వె.	వచ్చి పెక్కునాళ్ళు వసుధేశు వాకిలిఁ గాఁచి యతని సమ్ముఖంబు లేమి రోసి, ద్విజులు నృగుని నూసరవెల్లివై పుట్టుమనుచుఁ దిట్టి పోయి రనఘ!	366
శా.	ఆ శాపంబు నృగావనీశునకు బాహ్యద్వారగుల్‌ దెల్ప నెం తే శోకించి, నిజాశ్రితాప్త హితమంత్రి శ్రేణి కవ్వజ్ర సం కాశం బౌ ద్విజశాపమున్‌ నొడివి వేగన్‌ బుత్త్రు సర్వక్షమా ధీశుం జేసి, నయానయంబులు హితోక్తిన్‌ దెల్పి ధైర్యంబునన్‌	367
చం.	వలియును మంచు నెండయును వానయు గాలియుఁ జేర నీని బ ల్కలుగులు చేయఁ బంచి యది గన్పడ కుండఁగఁ బుట్టలుం బొదల్‌ బలువుగ సంఘటింపుఁడని పల్కి నిజాకృతి డించి చొచ్చి యం దలయుచునున్నవాఁ డిపుడు నా నృగుఁ డూసరవెల్లి రూపునన్‌	368
కం.	కావున మత్తుండగు నృపుఁ డా విధమున హానిఁ జెందు ననఘా! నిమియన్‌ భూవరుఁడును గురుశాపము చే వనరుట మత్తవృత్తిఁ జెందియ కాదే?	369