ఉత్తరరామాయణము - రావణుఁడు మేరుగిరింజేరి విడియుట - ఆంధ్రభారతి

రావణుఁడు మేరుగిరింజేరి విడియుట

సీ.	వీచోపుగుమి వీచువిధమున నునువెల్ల - జల్లుల మెకములు చఱులఁదిరుగఁ బావడ లిడునట్లు పతుల చెమ్మటఁ బయ్యె - దల మాన్చు సతులు నెత్తముల మెలఁగ దీపికావళి మించు తెఱుఁగున జ్యోతిర్ల - తావితానము లుపత్యకల వెలుఁగఁ జూపఁ జెంగట నిల్పు సొబగున హరులును - గరులును బాదాంతికముల నొలయ
గీ.	భవ్యమందాకినీక్షౌమపటముఁ గట్టి గైరికద్యుతికుంకుమ గంధ మలఁది వేడ్క గంధర్వగానముల్‌ వించు మించు కాంచనావనిభృన్మౌళిఁ గాంచె నతఁడు	32
తే.గీ.	కాంచి రజతాద్రిఁ బెఱకినకరణిఁ దన్నుఁ బెఱుక వలదని గిరి కాన్కఁబెట్టి నీకుఁ దటచరత్కుంభికరపతద్రత్నపాళిఁ గొను మనుచు మంత్రి యన నవ్వికొనుచు నచట	33
శా.	ఆనాఁడెల్ల వసించి తద్గిరి వినోదారామ లీలా విలో కానందామృతవార్ధి మగ్నుఁడయి దైత్యస్వామి కల్యంబునన్‌ స్నానాదిక్రియ లాచరించి, మణిచంచత్పుష్పకం బెక్కి ఛా యానీరేజదళేక్షణాధిపజిగీషాయత్తుఁడై యయ్యెడన్‌	34