ఉత్తరరామాయణము - తన భర్తను జంపిన రావణుని శూర్పణఖ దూఱుట - ఆంధ్రభారతి

తన భర్తను జంపిన రావణుని శూర్పణఖ దూఱుట

చం.	విమతజయంబుఁ గాంచి చని వీడు సొరంగనె, పుష్పకస్థిత ప్రమదల యార్త నాదములు వాటిలె వారికిఁదోడు వంత డ య్యు మనముతోడ శూర్పణఖయున్‌ విలపించుచు వచ్చి యన్న పా దములఁబడెన్‌ దృగశ్రుజలధారలు గాల్వలు గట్టి పాఱఁగన్‌	99
ఆ.వె.	పడిన యనుజనెత్తి బాష్పాంబుధారలఁ దుడిచి యాదరణము దోఁప మాట లాడఁ దొడఁగు నద్దశాస్యుకర్కశ చిత్త మెఱిఁగి చెలియ లళికి యిట్టు లనియె	100
ఉ.	వీరులు లేరొ? యెందుఁ బ్రతివీరులపైఁ జనరో? జయింపరో? యీరస మెత్తి నీవలె నికృష్టతఁ జెంది మఱింది నొంచిరే? శూరత నీకుఁ జూపఁదగు చోటులు లేవె? మహోగ్రపాపముల్‌ దూఱును సైఁచి నా బ్రదుకుఁద్రుంగఁగఁ చేసితి వేమి సేయుదున్‌	101
చం.	పరు లొనరించు పాపములఁబాపి హితాశ్రితబంధుకోటిఁ ద త్పరమతిఁబ్రోవ నోపుదని బాంధవులందఱు నమ్మియున్నచోఁ గరుణఁదొఱంగి నీతియును గాంచక వారల నీవ త్రుంప నె వ్వరు నిను నౌను గాదనెడువారు? నిశాచరచంద్ర! యీయెడన్‌	102
కం.	బలియురగు దొరలు తమ గా దిలి చెల్లెండ్రకు ధనంబుఁదెత్తురు గా కి ట్టుల మఱదిం బొరిగొని నీ వలె వైధవ్యంబుఁదెచ్చువారలు గలరే?	103
కం.	అని దూఱెడి చెలియలిఁగను గొని యతఁ డనుఁ దుములమునను గుఱు తెఱుఁగక డా సిన నీ పెనిమిటిఁ దునిమితి వెనుక నెఱిఁగి పొక్కిపడితి వెలఁదిరొ! యచటన్‌	104
కం.	చేదప్పిన కార్యములకు వేదనఁబొందుదురె? చాలు విడువు మిఁక మనః ఖేదము విధిఁ దప్పింపం గాఁదరమే నీకు నాకు? గామిని చెపుమా!	105
ఉ.	ఏమి కొఱంత నీకు? జలజేక్షణ! కోరిన యెల్ల వస్తువుల్‌ ప్రేముడి నే నొసంగెదఁ దపింపకు నా యనుజాతవైన ని నీ మహిఁదేఱి చూడఁగలరే? సురమానవదైత్యదానవ గ్రామణు లిచ్చ వచ్చిన ప్రకారమునం జరియింపు మెయ్యెడన్‌	106
చం.	మన పినతల్లిపట్టి ఖరమానవభోజివరుండు దండకా వనమున దూషణాద్యనుజవర్గముతో వసియింపఁబోయెడిన్‌ జను మతఁ డాదరించు నిను సర్వధనంబును నేను బంచెదన్‌ వనజదళాక్షి! నా కడకు వచ్చుచుఁ బోవుచునుండు మెప్పుడున్‌	107
కం.	నే నొకటియు నతఁడొకటియు నే నీకు మృగాక్షి! యని యనేకగతుల స మ్మానించి ఖరుని రక్ష స్సేనాన్వితుఁ బిలిచి దనుజశేఖరుఁ డనియెన్‌	108
చం.	కవి వచియించె రాక్షసనికాయ్యముగాఁగల దంచు దండకా టవి యటుగాన నిల్వు మచటన్‌ బదునాలుగువేల రక్కసుల్‌ భవదనుజన్ములుంగొలువఁ బాళెము పట్టొకచో రహింప నీ యవరజ దీని శూర్పణఖ నారసికొంచు సమాదరంబునన్‌	109
చం.	త్రిశిరుఁడు మంత్రి దూషణుఁడు ధీరుఁడు నీ దళవాయి యంచు న ద్దశముఖుఁ డాతనిం బనుపఁదారును నేఁగి బలంబుతోఁ జతు ర్దశభువనంబులుం దలఁక దారుణవృత్తి ఖరుండు దండకా ప్రశములపాలి మృత్యువయి రాజ్యము సేయుచునుండె నయ్యెడన్‌	110
ఉ.	ఆ దశకంఠుడంతఁ దన యంతిపురం బొకయింత సొచ్చెనో లేదొ? నిజాగ్రపుత్త్రుఁడట లేమి నికుంభిళ నధ్వరక్రియో త్పాదనకాంక్ష నున్కి విని తానునునేఁగెఁ దదాననేక్షణా హ్లాదపరీతబుద్ధియయి యచ్చటి కందఱు వెంబడింపఁగన్‌	111