 |
    |
    |
 |
    |
    |
 |
 |
ఇతిహాసములు | ఉత్తరరామాయణము | మేఘనాదుం డింద్రజిత్తగుట |  |
మేఘనాదుం డింద్రజిత్తగుట
| మ. | అలుకన్ దేరును దా నదృశ్యుఁడయి మాయాధ్వాంతమున్ దిక్కులన్ బలియన్ జేయుచు నింద్రునిం బొదివి, తర్పార్శ్వస్థులౌ దిక్పతుల్ తలఁకన్ మాతలిపైఁ బతాకపయి రథ్యశ్రేణిపైఁ దేరిపై బలుతూపుల్ నిగుడించి యార్చిన బలప్రత్యర్థి విభ్రాంతుఁడై. | 351 |
| మ. | అరదం బయ్యెడ డిగ్గి, యగ్గలికతో నైరావతారూఢుఁడై పరునింగానక నాల్గుదిక్కు లరయన్ బౌలస్త్యపుత్రుం డగో చరుఁడై గోచరచక్రవర్తి సొలయన్ శస్త్రాస్త్రముల్ నించి బం ధురమాయాతిమిరాంధుఁడౌ నతని బద్ధుం జేసెఁ బాశావళిన్. | 352 |
| వ. | అప్పుడు | 353 |
| ఉ. | అత్తెఱఁగెల్లఁదెల్లముగ నారసి యుబ్బుచు దైత్యసత్తముల్ మత్తిలి, మేఘనాదుఁ బలుమాఱు నుతించుచుఁ గేకవ్రేయుచున్ నృత్తము సేయుచున్ జెలఁగి రింద్రుని కొందలపాటుఁ జూడలే కత్తఱి రుద్రసాధ్యమరుదశ్విను లార్చుచు ధీరచిత్తులై. | 354 |
| చం. | చలమున రావణుం బొదివి సాయకజర్జరితాంగుఁజేసి త ద్బలముల నొవ్వనేసి గుమిఁ బాయక పైపయిఁగ్రమ్ముకొన్న బి ట్టలసి దశాననుండును బ్రయత్నముతో ననిసేయ నంబర స్థలమున నుండి చూచి రభసంబున రావణి వచ్చి యార్చుచున్. | 355 |
| మ. | ప్రళయాభ్రం బమితాశనుల్ గురియుదర్పం బేర్పడన్ వారిపై శిలలుం బర్వతశృంగముల్ శరములున్ జేయార వర్షించి ద వ్వులకుం బాఱఁగఁ ద్రోలి తండ్రిఁగని - దివ్యుల్ పాఱి, రింద్రుండు దు ర్భలుఁడై నా చెయిఁజిక్కె నేలయిఁక సంగ్రామంబు? దైత్యేశ్వరా! | 356 |
| చం. | మగఁటిమి నీడు గాని సురమండలితో నని సేయనేల? ము జ్జగములకీవె నాథుడవు సైన్యములన్ మరలింపఁబంపు నీ కగపడె వీఁడె వాసవుఁడటంచును జూపిన మేఘనాదునిన్ బిగియఁ గవుంగిలించి, కడుఁబ్రీతి వహించి దశాస్యుఁ డిట్లనున్. | 357 |
| చం. | వెలసెఁగులంబు నీవలన విక్రమధైర్యనిధాన! పోరిలో బలరిపునంతవానిఁ జెఱఁ బట్టఁగ నెవ్వరికైన శక్యమే! తెలిసిరి నీ ప్రతాప మదితిప్రియపుత్రులు ముజ్జగంబులన్ వలసినయట్లకొంటి నినువంటికుమారుఁడు కల్గియుండుటన్. | 358 |
| ఉ. | అందఱిలోనఁ బెంపును జయంబును జెందితిగాన ముందు నీ స్యందన మేఁగనిమ్ము వెను చక్కిన వచ్చెద నేను సేనతో నిందఱు జోదులుం గొలువ నియ్యెడనంచు గుమారుఁబంచి మి న్నంది బలంబుతో వెనుకయై దశకంధరుఁడేఁగె వేడుకన్. | 359 |
| వ. | ఇవ్విధంబున | 360 |
| చం. | సుతుని పురస్కరించుకొని సూరెల మంత్రులు సంస్తుతింపఁగా శతమఖు గుండె దిగ్గుమన సర్వనిశాచరసేన గొల్వఁగా నమలమహావిభూతి మెఱియన్, దన ప్రోలికిఁబోయి సోదరా న్వితుఁడయి పౌరులుల్లసిల వేడుక నొందుచునుండె రాఘవా! | 361 |
| కం. | అని కుంభజుఁ డెఱిఁగించిన విని యింద్రుం డెటులు మరల విడిపించుకొనెన్ వినిపింపుఁ డవలి కథ యని మనువంశనృపాలమౌళి యడుగుటయున్. | 362 |
|
 |
|