ఉత్తరరామాయణము - మాంధాత లవణాసురునిచే మృతుండైన కథను చ్యవనుడు శత్రుఘ్నునకుఁ జెప్పుట - ఆంధ్రభారతి

మాంధాత లవణాసురునిచే మృతుండైన కథను చ్యవనుడు శత్రుఘ్నునకుఁ జెప్పుట

మ.	అనఘా! యా లవణుండు మేటియని మీ రానాఁడు మా స్వామితో ననఁగా నేనును వింటి నైన శివదత్తాభీలశూలంబుచే ననిలో నెవ్వరినైన వీఁడడఁచెనే? యా చందముల్‌ గల్గినన్‌ వినిపింపందగు నన్న నా చ్యవనమౌనిశ్రేష్ఠుఁ డిట్లం చనున్‌	106
కం.	అన్నా యా లవణాసురు సన్నాహముతోడఁ గదియఁజని శూలముచే మున్నాజిఁబడిన రాజుల నెన్నంగా శక్యమే ఫణీంద్రునకైనన్‌	107
కం.	వచ్చిన నృపు లీతనిచేఁ జచ్చిన నృపు లెందఱో యసంఖ్యు లదేలా? మచ్చరమున లవణునిచే నొచ్చెన్‌ మాంధాతయును, వినుము వివరింతున్‌	108
మ.	యువనాశ్వుండను రాజనందనుఁడు ధైర్యోదాత్తహేమాద్రి శా త్రవ శిక్షా క్షమ విక్రమ క్రముఁడు మాంధాతృక్షితీశుండు ము న్నవనీనాథుల నెల్ల గెల్చి సురలోకాధ్యక్షు నిర్జించి య ద్దివముం జేకొన నెంచి దండు వెడలెన్‌ దీవ్యత్ప్రతాపంబునన్‌	109
కం.	వెడలి కడవన్నె గుబ్బలి గడిచి దివికి మించి రాఁగఁ గాంచి మొగుల్‌ త త్తడిజో డతని జయించుట కడు భరమని యెఱిఁగి వచ్చి కపటమతి ననున్‌	110
ఉ.	ఇమ్ముల భూమి శాత్రవుల నెల్ల జయించికదా సమర్థతన్‌ మమ్ము జయింప రావలయు మానవనాయక! నీ కజయ్యుఁడై యమ్మధుపుత్రకుండు లవణాసురుఁ డుండఁగ నెట్లు వచ్చినా విమ్మెయి వాని గెల్వకయె యింద్రునిపై నన రాజు సిగ్గునన్‌	111
ఆ.వె.	వానిఁ దాఁ కి పిదప వచ్చెద నీ వీటి కనిన నటులఁ జేయు మనుచు నింద్రుఁ డరిగె నాకమునకు నవనీంద్రుఁ డలుకతో మధువనంబు కడకు మసలకేఁగి	112
చం.	ఉపవనవీథి దండు దిగి యుద్ధతితో నొక దూత నంపినన్‌ గుపితమనస్కుఁడౌ లవణు కొల్వునకుం జని వాఁడు వానిచే నపహృతకాయుఁడయ్యె, నృపుఁడంతట నంతకుమాడ్కిఁ బేర్చి య చ్చపలునిఁ జేరఁబోయి దనుజాతకులాధమ! పోర రమ్మనన్‌	113
చం.	గంధేభంబు నెదుర్చుకేసరివలెన్‌ గర్జింపుచున్‌ వాఁడు గ ర్వాంధత్వంబున శూల ముద్దవిడి వ్రేయన్‌ దచ్ఛిఖల్‌ గప్పినన్‌ బంధువ్రాతముతో నమాత్యతనుజాప్తశ్రేణితో సేనతో మాంధాతృక్షితినాయకుం డపుడె భస్మంబయ్యె నొక్కుమ్మడిన్‌	114
ఉ.	కావున వాఁడు ముమ్మొనలకైదువుఁ బూనినవేళఁ బోరికిం బోవకుమీ నృపాలసుత! మున్నె సమస్తముఁ దెల్పినాఁడు రా మావనిభర్త దెల్పవలెనా యిఁక మేమును? రే పవశ్యమున్‌ నీవు జయింతు వా లవణునిన్‌ నిదురింపుము నేఁడు నావుడున్‌	115
కం.	ఆ శత్రుఘ్నుఁడు చ్యవనుని పేశల భాషల ముదంబు బెరయుచు నిద్రా వేశముఁ జెందెడి నంతఁ గు శేశయహితుఁ డుదయశిఖరి శిఖరముఁ జేరెన్‌	116
ఉ.	అంతకు మున్నె లేచి యతఁడాహ్నిక కృత్యము లెల్లఁ దీర్చి య త్యంతదయా ప్రసన్నులగు నచ్చటి మౌనులకెల్ల మ్రొక్కి వా రెంతయు వేడ్క శత్రుని జయింపు మటం చనుపన్‌ శరాస దు ర్దాంత కృపాణతూణములు దాల్చి కళిందజ దాఁటి చెచ్చెరన్‌	117
కం.	మాధవు దేవికి నిరవగు మాధవపుర మెదుటఁ జూచి మది ధైర్యంబున్‌ గ్రోధముఁ బెనఁగొన నుపవని యోధాగ్రణి యతఁడు వేచియుండెడి వేళన్‌	118