 |
    |
    |
 |
    |
    |
 |
 |
ఇతిహాసములు | ఉత్తరరామాయణము | అగస్త్యుఁడు రామునకు జనస్థానవృత్తాంతముఁ జెప్పుట |  |
అగస్త్యుఁడు రామునకు జనస్థానవృత్తాంతముఁ జెప్పుట
| తే.గీ. | అప్పురంబు రజోవృష్టి నడఁగి యడవి యగుట నది దండకారణ్యమనఁగఁబరఁగెఁ గావ్యుని మహోగ్ర శాపంబుకతన నాఁటి నుండియును బ్రాణిశూన్యమై యుండు నధిప! | 339 |
| ఉ. | తాను గురూక్తి నయ్యరజ దారుణమైన తపంబొనర్చె న క్కానన మధ్యసీమ మునుఁగల్గ రజోమయవృష్టి కోర్వ క మ్మానినిఁజేరి రల్ల మధుమంతము పౌరులు దానిచే జన స్థానమనంగ నన్నెలవు ధాత్రిఁ బ్రసిద్ధి వహించె రాఘవా! | 340 |
| మ. | అరజాసంగత యోజనాయత సరః ప్రాంతంబుఁ బ్రాపించువా రు రజోవృష్టికిఁ దప్పి పోదు రని శుక్రుం డాడుటన్ గొంద ఱా సరసీతీరము కానలన్ బ్రదికి స్వేచ్ఛంబోయి రంచున్ ఖరా సురవిధ్వంసి కగస్త్యమౌని దెలిపెన్ శ్రోత్రంబు లింపొందఁగన్ | 341 |
| కం. | తెలిపిన కథ విని రఘుపతి కలశజునిం బెక్కు గతుల గణియించుచు సొం పలరఁ దథావిధ భాషణ ముల నా నిశి గడపె నంతఁ బ్రొద్దుదయించెన్ | 342 |
| ఆ.వె. | ప్రొద్దు వంగడమునఁ బుట్టిన పుడమిఱేఁ డప్పు డాచరింప నర్హమైన కృత్యమెల్లఁ దీర్చి యేతెంచి యమ్మహా ఋషికి నతి యొనర్చి యిట్టు లనియె | 343 |
| చం. | ధరఁగల తీర్థకోటులకుఁ దానకమై విలసిల్లు మీ పదాం బురుహము లాశ్రయించితి మిముం గని కొల్చితి మాటలాడితిన్ బొరసితి మీ యనుగ్రహము పుణ్యుఁడనైతి ననుజ్ఞయిచ్చినన్ బురికిఁకఁ బోయివచ్చెదఁ దపోధనశేఖర! యంచుఁ బల్కినన్ | 344 |
| మ. | పరితోషించి యగస్త్యుఁడిట్లనియె నో భక్తాననాంభోజభా స్కర! సాధారణధారుణీంద్రువలె నజ్ఞత్వంబుఁ బైఁబూని యి క్కరణిన్ నన్ను నుతింపనేమిటికి? సాక్షాత్తారకంబైన య క్షరతత్త్వంబవు నీవు నిన్నుఁ దెలియంగా శక్తులే మాదృశుల్? | 345 |
| సీ. | మొదట నెవ్వని పాదమునఁబుట్టి నదులలో - ఘనకీర్తిఁ గాంచె గంగాస్రవంతి మునిముఖ్యు లెవ్వాని మూర్తిఁ గానఁగ లేక - తపియింపుదురు మహాతపములూని యెవ్వాని వాక్యంబు లీరేడు జగముల - శిక్షించు గౌరవశ్రీ వహించి మహిమ నెవ్వని యనుగ్రహము కించిజ్ఞుల - సర్వజ్ఞులుగఁ జేసి సవదరించు | |
| గీ. | నట్టి హరివైన నీకు నర్ఘ్యం బొసంగి కన్నులలరంగఁ జూచితిఁ గాంక్ష దీరఁ బలుకులును వింటి మీ కృప బడయఁగంటి ‘నద్య ధన్యో-స్మి’ యనుకొంటి నాత్మయందు | 346 |
| సీ. | నియతి ‘రామా’ యంచు నీ నామము జపించు - భాగ్యశాలికి వేదపాఠమేల? నినునొక్కపరియైనఁ గనుఁగొన్న సుజ్ఞాన - నిధికి బ్రహ్మజ్ఞాననిష్ఠ లేల? నీ భక్తి యొనరించు నిపుణుఁ జేరి భజించు - స్థిరబుద్ధికిఁ దపంబుసేయనేల? నీ కటాక్షము దారి నిమిషమాత్రము చేరి - చెలఁగు మేటికిఁ దీర్థసేవలేల? | |
| గీ. | నీ వినుతి సేయువారికి నిక్కువముగఁ జింతసేయంగ నణిమాదిసిద్ధులేల? జానకీనాథ! మీ పాదజలముగ్రోలు ఘనగుణాబ్ధికి దేవత్వకాంక్షయేల? | 347 |
|
 |
|