 |
    |
    |
 |
    |
    |
 |
 |
పురాణేతిహాసములు | శ్రీమహాభాగవతము | దశమస్కంధము - పూర్వభాగము |  |
శ్రీ కృష్ణమూర్తి మథురానగరప్రవేశము సేయుట
| క. |
యదుకులవిద్వేషణుఁడై, మదమున వర్తించు కంసు మర్దించి భవ త్సదనంబుఁ జూడ వచ్చెదఁ, బొద యీ స్యందనముఁ గొనుచుఁ బురమున కనఘా!. |
1243 |
| వ. | అని పలికిన నక్రూరుండు పురంబునకుం జని రామకృష్ణులు వచ్చి రని కంసున కెఱింగించి తన గృహంబునకుం జనియె; నంత నపరాహ్ణంబున బలభద్రగోపాలసహితుండై కృష్ణుండు. | 1244 |
| మ. |
పరిఖల్ గోటలుఁ గొమ్మలుం బడగలుం బ్రాసాదముల్ వీథులున్ హరులుం దేరులు వీరులున్ గజములున్ హర్మ్యంబులున్ వాద్యముల్ తరుణుల్ ధాన్యములున్ ధనంబులు మహోద్యానంబులున్ దీర్ఘికల్ గర మాశ్చర్యరుచిం దనర్చు మథురన్ గాంచెన్ విభుం డంతటన్. |
1245 |
| వ. | కని య ప్పురంబు ప్రవేశించి వచ్చు సమయంబున. | 1246 |
| ఉ. |
‘నందతఫఃఫలంబు, సుగుణంబులపుంజము, గోపకామినీ బృందమునోముపంట; సిరివిందు; దయాంబుధి; యోగిబృందముల్ డెందములందుఁ గోరెడు కడింది నిధానము సేరవచ్చె నో సుందరులార! రండు చని చూతము కన్నుల కోర్కి దీఱఁగన్. |
1247 |
| వ. | అని మఱియు గోవిందసందర్శనకుతూహలంబులఁ బౌరసుందరులు పరస్పరాహూయమానలై భుంజానలై భోజనభాజనంబులు దలంగఁ ద్రోచియు, శయానలై లేచియు, నభ్యజ్యమానలై జలంబు లాడకయు గురుజనశిక్ష్యమాణలై యోడకయు, గృహకార్యప్రవర్తమానలై పరిభ్రమింపకయు, రమణరమమాణలై రమింపకయు, శిశుజన బిభ్రాణలై డించియు, నలంకుర్వాణలై యన్యోన్య వస్త్రాభరణ మాల్యానులేపనంబులు వీడ్వడ ధరించియు నరిగి. | 1248 |
| క. |
వీటఁ గల చేడె లెల్లను, హాటకమణిఘటితతుంగహర్మ్యాగ్రములం గూటువలు గొనుచుఁ జూచిరి, పాటించి విశాలవక్షుఁ బద్మదళాక్షున్. |
1249 |
| సీ. |
వీఁడటే రక్కసి విగతజీవగఁ జన్నుఁబాలు ద్రావిన మేటిబాలకుండు వీఁడటే నందునివెలఁదికి జగమెల్ల ముఖమందుఁ జూపిన ముద్దులాఁడు వీఁడటే మందలో వెన్నలు దొంగిలి దర్పించి మెక్కిన దాఁపరీఁడు వీఁడటే యెలయించి వ్రేతలమానంబు సూఱలాడిన లోకసుందరుండు |
|
| తే. |
వీఁడు లేకున్న పుర మటవీస్థలంబు, వీనిఁ బొందనిజన్మంబు విగతఫలము వీనిఁ బలుకనివచనంబు విహగరుతము, వీనిఁ జూడనిచూడ్కులు వృథలు వృథలు. |
1250 |
| మ. |
చెలియా! గోపిక లీ కుమారతిలకుం జింతించుచుం బాడుచుం గలయం బల్కుచు నంటుచున్ నగుచు నాకర్షింపుచున్ హస్తగా మలకక్రీడకుఁ దెచ్చి నిచ్చలును సమ్మానంబులం బొందఁగాఁ దొలి జన్మంబుల నేమి నోఁచిరొ కదే దుర్గప్రదేశంబులన్ |
1251 |
| క. |
అని మఱియుఁ బౌరకాంతలు, మునుకొని హరిరూపు నేత్రముల వెంటను లోఁ గొని తాల్చిరి హృదయములను, జనితప్రమదమున విరులు సల్లుచు నధిపా! |
1252 |
| వ. | మఱియును. | 1253 |
| క. |
నానావిధగంధములుఁ బ్ర, సూనఫలాదులును హరితశుభలాజములుం గానిక లిచ్చుచు విప్రులు, మానుగఁ బూజించి రా కుమారోత్తములన్. |
1254 |
| వ. | ఆ సమయంబున నగరద్వారంబు నుండి వచ్చు రాగకారుండగు నొక్క రజకుం గని హరి యిట్లనియె. | 1255 |
|
 |
|