 |
    |
    |
 |
    |
    |
 |
 |
పురాణేతిహాసములు | శ్రీమహాభాగవతము | దశమస్కంధము - పూర్వభాగము |  |
సూర్యాస్తమయ చంద్రోదయముల వర్ణనము
| మ. |
గగనారణ్యచరాంధకారగజముం గాలాహ్వయవ్యాధుఁ డ చ్చుగఁ బట్టన్ గమకించి మ చ్చిడుటకై చూతాంకురశ్రేణిచే నొగిఁ గల్పించిన కందుకం బనఁగ సూర్యుం డంత వీక్షింపఁగాఁ దగె మందప్రభతోడ పశ్చిమమహాధాత్రీధరేంద్రంబునన్. |
1288 |
| క. |
తరుణుఁ డగు శీతకరునిన్, మరగి వియల్లక్ష్మి దన్ను మాని ముదుకఁడున్ ఖరకరుఁడు ననుచు ద్రొబ్బిన, కరణిన్ రవి పశ్చిమాద్రికడఁ గ్రుంకె నృపా! |
1289 |
| క. |
కళలు కలుగుఁ గాక కమల తోడగుఁ గాక, శివుని మౌళిమీఁదఁ జేరుఁగాక నన్యు నొల్లఁ దపనుఁడైన మత్పతి యని, సాధ్విభంగిఁ గమలజాతి మొగిడె. |
1290 |
| క. |
సుందరసాయంసంధ్యా, వందనవిప్రార్ఘ్యతోయవజ్రహతోద్య న్మందేహాసురరక్త, స్యందము క్రియఁ గెంపుసొం పెసఁగె నపరదిశన్. |
1291 |
| ఆ. |
భూమి నుండి మింటఁ బూర్ణమై కర్కట, మకర మీనరాశి మహితమైన హరియశస్సుధాబ్ధియందులతుంపురు, లనఁగ జుక్క లొప్పె నాకసమున. |
1292 |
| క. |
ఎల్లదిశలు నిండిన శ్రీ, వల్లభు గుణమహిమ బ్రహ్మ వాసించుటకై చల్లినమృగమద మనఁగా, వెల్లివిరిసెఁ దమము గగనవీథుల నెల్లన్. |
1293 |
| క. |
ఆ చీఁకటి వెనుతగిలినఁ, బ్రాచీదిశనుండి గంతుఁ బరువున రవి భ ర్మాచలము మలఁక త్రోవను, వే చనియెంగాక నిలిచి విఱుగక యున్నే? |
1294 |
| ఉ. |
మీకును వైరి; యెప్పుడును మిక్కిలి మాకును వైరి; రాజు దో షాకరుఁ; డింక వచ్చు జలజాతములార! మదీయబాలురం జేకొనుఁ డంచు బాలకులఁ జీఁకటి దాఁచిన భంగిఁ జిక్కి రా రాక వసించెఁ దుమ్మెదలు రాత్రి సరోరుహకుట్మలంబులన్. |
1295 |
| సీ. |
ప్రాచీదిశాంగనాఫాలతలంబున, దీపించు సిందూరతిలక మనఁగ దర్పించి విరహులధైర్యవల్లులు ద్రెంప, దర్పకుం డెత్తిన దాత్ర మనఁగ నలిగి కాలకిరాతుఁ డంధకారమృగంబు ఖండింప మెఱయించు ఖడ్గ మనఁగ గగనతమాలవృక్షము తూర్పుకొమ్మను, లలితమై మెఱయు పల్లవ మనంగఁ |
|
| ఆ. |
దొగలు సంతసిల్ల దొంగలు భీతిల్లఁ, గడలి మిన్ను ముట్టి కడలుకొనఁగఁ బొడిచె శీతకరుఁడు భూరిచకోరక, ప్రీతికరుఁడు జారభీతికరుఁడు. |
1296 |
| క. |
దర్పితతారాధిపపరి, సర్పిత కిరణౌఘమిళితసకలదివంబై యేర్పడి కమలభవాండము, గర్పూరపుఁ గ్రోవిభంగిఁ గనుపట్టె నృపా! |
1297 |
| క. |
ఆ రేయి గోపయుతులై, క్షీరాన్నము గుడిచి రామకృష్ణులు మదిఁ గం సారంభ మెఱిఁగి యిష్ట వి, హారంబుల నప్రమత్తులై యుండి రిటన్. |
1298 |
| క. |
తన పురికి రామకృష్ణులు, సనుదెంచి నిజానుచరులఁ జంపుటయు మహా ధనువు గదిసి విఱుచుటయును, విని కంసుఁడు నిదుర లేక విహ్వలమతియై. |
1299 |
| సీ. |
కర్ణరంధ్రములు చేఁ గప్పిన లోపలి ప్రాణఘోషము వినఁబడక డిందెఁ దోయాదికములందుఁ దొంగిచూచిన యంతఁ దల గానరా దయ్యెఁ దనువుమీఁదఁ గరశాఖ నాసికాగ్రంబుపై నిడి చూడ గ్రహతారకలు రెండుగా నగపడె వెలుఁగున నిలుచుండి వీక్షింపఁగా మేనినీడ సరంధ్రమై నేలఁ దోఁచె |
|
| ఆ. |
నడుగుజాడ దృష్టమౌట లే దయ్యెను, దరువులెల్ల హేమతరువు లగుచు మెఱయుచుండెఁ గాలమృత్యువు డగ్గఱ, బుద్ధి యెల్లఁ గలఁగె భోజపతికి. |
1300 |
| క. |
గరళముఁ దినుటయుఁ బ్రేతముఁ, బరిరంభించుటయు నగ్నభావుఁ డవుటయున్ శిరమునఁ దైలము వడుటయు, ఖరపతి నెక్కుటయు నతఁడు కలలోఁ గనియెన్. |
1301 |
| వ. | మఱియు రక్తకుసుమమాలికాధరుండై యొక్కరుండును నెక్క డేనియుం జనుచున్న వాఁడ నని కల గాంచి మరణహేతుక భీతిఁ జింతాక్రాంతుండై నిద్రఁ జెందక వేగించుచున్న సమయంబున. | 1302 |
|
 |
|