 |
    |
    |
 |
    |
    |
 |
 |
పురాణేతిహాసములు | శ్రీమహాభాగవతము | దశమస్కంధము - ఉత్తరభాగము |  |
ధర్మరాజు శ్రీకృష్ణు ననుమతంబున భీమాదుల దిగ్విజయమునకుఁబంపుట
| సీ. |
ధరణీశ! యొకనాఁడు ధర్మతనూజుండు ప్రవిమలనిజసభాభవనమందు హితులు మంత్రులు పురోహితులును సుతులును మిత్రులు బంధువుల్ క్షత్రవరులుఁ బరిచారకులు సూత పాఠక కవి బుధవరులును మునులును వరుసఁ గొలువఁ జిరలీల నవరత్నసింహాసస్థుఁడై గొలువుండి వినతుఁడై నలిననాభు |
|
| తే. |
భువనరక్షణదక్షు నద్భుతచరిత్రు, యదుకులేశ్వరు మురదైత్యమదవిభేది నాప్తు నయవేదిఁ జతురుపాయప్రవీణుఁ, జూచి, యిట్లని పలికె నస్తోకచరిత! |
697 |
| తే. |
అనఘచారిత్ర! రాజసూయాధ్వరంబు, నెమ్మిఁ గావించువేడుక నెమ్మనమున నెనయుచున్నది యది నిర్వహింప నీవ, కాక నా కాత్మబంధువుల్ గలరె యొరులు? |
698 |
| ఉ. |
ఎవ్వరు నీ పదాంబుజము లెప్పుడుఁ గొల్తురు భక్తినిష్ఠులై యెవ్వరు నిన్నుఁ బ్రేమ నుతియింతురు భూరివివేకశాలురై యవ్విమలాత్ము లందుదు రుదంచితశోభననిత్యసౌఖ్యముల్ నివ్వటిలంగఁ గృష్ణ! నిను నేర్చి భజించిన రిత్తవోవునే? |
699 |
| వ. | అనినఁ గృష్ణుండు ధర్మనందనున కిట్లనియె | 700 |
| చ. |
నయగుణశాలి! పాండునృపనందన! నీ తలఁ పొప్పు నీ క్రతు క్రియ మునిదేవతాపితృసుకృత్యమునై నిఖిలోగ్రశాత్రవ క్షయమును బాంధవప్రియము సంచితపుణ్యము నిత్యకీర్తియున్ జయము నొసంగు దీనిఁ గురుసత్తమ! వేగ యుపక్రమింపవే! |
701 |
| క. |
మనుచరిత! నీ సహోదరు, లనుపమదివ్యాస్త్రవేదు లాహవభూమిం జెనకిన వైరినృపాలురఁ, దునుమఁగఁ జాలుదురు శౌర్యదుర్దమభంగిన్. |
702 |
| క. |
గెలువుము విమతనృపాలుర, వెలయుము బుధవినుతమైన విశ్రుతకీర్తిన్ నిలుపుము నిఖిలధరా మం, డలిని భవచ్ఛాసనము దృఢంబుగఁ జెల్లన్. |
703 |
| క. |
నీ పంచుకార్య మొరులం, జూపక యేఁ జేయ నిన్ను జుట్టన వ్రేలం జూపఁగ వచ్చునె! సకల ధ, రాపతులకు నీకుఁ జేయరానిది గలదే!. |
704 |
| వ. | కావున. | 705 |
| క. |
విమలమతి నిట్టి మఖ రా, జమునకుఁదెప్పింపవలయు సంభారంబుల్ సమకూర్పుము; నీ యనుజుల, సమదగతిం బంపు నిఖిలశత్రుల గెల్వన్. |
706 |
| క. |
అను మాటలు విని కుంతీ, తనయుఁడు మోదమునఁ బొంగి తామరసాక్షున్ వినుతించి శౌర్యకలితుల, యనుజుల దెసఁ జూచి పలికె హర్షముతోడన్. |
707 |
| క. |
సృంజయభూపాలకులును, గుంజరరథవాజిసుభటకోటులు నినుఁ గొ ల్వం జను మని సహదేవుని, నంజక పొ మ్మనియె దక్షిణాశ జయింపన్. |
708 |
| క. |
ప్రకటచతుర్విధసేనా, ప్రకరంబులు గొలువఁ బంచెఁ బడమటిదిశకున్ నకులున్ విదళితరిపుభూ, పకులున్ శౌర్యంబు మెఱసి పార్థివముఖ్యా! |
709 |
| క. |
దుర్జనభంజను శౌర్యో, పార్జితవిజయప్రకాండు నాహవనిపుణు న్నర్జునమహితయశోనిధి, నర్జును నుత్తరపుదిశకు ననిచె నరేంద్రా! |
710 |
| ఆ. |
మహితశౌర్యనిధులు మత్స్యకేకయ మద్ర, భూతలేంద్రబలసమేతముగను దర్పమొప్పఁ బంచెఁ దూర్పుదిక్కునకు ను, ద్దామనిహతవైరిధాము భీము. |
711 |
| చ. |
పనిచిన వార లేగి ఘనబాహుపరాక్రమవిక్రమంబుల న్ననుపమశౌర్యులైన చతురంతమహీశుల నోర్చి కప్పముల్ కనకవినూత్నరత్నతురగప్రముఖాఖిలవస్తుజాతముల్ గొని చనుదెంచి ధర్మజునకుం బ్రణమిల్లి యుదాత్తచిత్తులై., |
712 |
| చ. |
తమతమ పోయి వచ్చినవిధంబుల భూపతులన్ జయించుటల్ క్రమముగఁ జెప్ప నందుల జరాతనయుం డరివెట్టఁ డయ్యె నం చమరవరేణ్యనందనుఁ డహంకృతి దక్కఁగ విన్నవించినన్ యమసుతుఁ డూరకుండె వికలాత్మకుఁడై విని యంతఁ గృష్ణుఁడున్. |
713 |
| తే. |
ధర్మనందనుఁ జూచి యుత్కలికతోడఁ, బలికె మాగధుఁ బోరఁ జంపఁగ నుపాయ మొకటి గల దది సెప్పెద నుద్ధవుండు, నాకుఁ జెప్పినచందంబు నయచరిత్ర! |
714 |
| చ. |
విను మగధేశ్వరుం డెపుడు విప్రజనావళియందు భక్తియున్ వినయముఁ గల్గి యెద్దియును వేఁడినచో వృథసేయ కిచ్చుఁ గా వున విజయుండునుం బవనపుత్రుఁడు నేనును బ్రాహ్మణాకృతిం జని రణభిక్ష వేఁడిన వశంవదుఁడై యతఁ డిచ్చుఁ గోరికల్. |
715 |
| వ. | అట్టియెడ. | 716 |
|
 |
|