శ్రీమహాభారతము - ఆనుశాసనికపర్వము - ద్వితీయాశ్వాసము - వాసుదేవ నారద సంవాద ప్రకారము - కవిత్రయ భారతము - కవిత్రయము - నన్నయ - తిక్కన - ఎఱ్ఱన - ఆంధ్రమహాభారతము

వాసుదేవ నారద సంవాద ప్రకారము (సం. 13-66-1 (కుంభ))

వ.	‘తన కడకు నారదుఁడు వ \| చ్చిన సత్కారము దగంగఁ జేసి, ముకుందుం డను సమధిక బహుమానం \| బున ‘నెవ్వారలకు నీవు మ్రొక్కుదు చెపుమా!’	131
వ.	అనిన నద్దేవముని యద్దేవకీనందనున కిట్లనియె.	132
సీ.	‘వరుణు, సమీరణుఁ, దరణిఁ, బర్జన్యుని, \| సప్తార్చి, నీశాను, షణ్ముఖుని, మ హాలక్ష్మి విష్ణుని, నజు, బృహస్పతిఁ, జంద్రు \| జలముల, భూమి, నెజ్జనము లెపుడు నతిభక్తి సేవింతు రట్టి వారలకు నే \| మ్రొక్కుదు; వేదపరులుఁ, దపోధ నులు, దేవతా పూజనులు, భూమి ధన ధాన్య \| గోదాన శీలురు, నాదరంబు
ఆ.	గల్గి యతిథిపూజ గావించువారలుఁ \| బితృసమర్చకులును, భిక్షితాన్న పూత శాంత భావములు గలవారు స \| త్యవ్రతులును బూజ్యు లనఘ! నాకు.	133
క.	వినుత త్రివర్గనిరతులు, \| ననహంకార మమకారులగు జనులు, సువ ర్తన యుతులు, నలోలురు, బో \| ధనులు, నమస్కార్యు లద్రిధర! విను నాకున్‌.	134
క.	నీవును, మత్సంపూజ్య జ \| నావలిఁ జిత్తమున నెఱిఁగి, యర్చనమును, సం సేవనము, నడుప భూరి శు \| భావహ మగు నవ్విధంబు యాదవసింహా’!	135
క.	అనియెం గావునఁ గుంతీ \| తనయాగ్రజ! నీవు నివ్విధముల జనములం గొనియాడుము, వారలు శో \| భనము లొసంగుదు రఘంబుఁ బాపుదురు కృపన్‌.’	136
వ.	అనిన విని యమ్మహీశ్వరుం డమ్మహితాత్మున కిట్లనియె.	137
క.	‘జనపతులకుఁ గర్తవ్యము \| లనేకములు గలవు వానియన్నిటిలోనన్‌; వినుత ప్రధానకృత్యం \| బనఘచరిత ! చెప్పవే దయం దెలియంగన్‌.’	138
క.	అనుటయు నతనికి నతఁడి \| ట్లను; ‘సామ్రాజ్యాభిషిక్తుఁడైన నృపతికిన్‌ విను, కర్తవ్యతమం బగు \| పని, బ్రాహ్మణపూజనంబు భవ్యవిచారా!	139
క.	భూనాథ! విప్రులు సమా \| ధానంబున నున్నఁ బొదలు ధరణి, శుభమ్ముల్‌ మానార్హు లగుట, వారికి \| మానన లేకున్న నడఁగు మనుజాధీశా!	140
క.	దైవంబు నదైవముగ, న \| దైవము దైవముగఁ జేయ ధరణీదివిజుల్‌ భూవర! శక్తులు విను వా \| రేవానికిఁ గూర్తు రతఁ డధీశత నొందున్‌.	141
క.	కోపమునఁ, బ్రసాదంబున, \| నాపదయును,సంపదయును, నప్పుడ తే వా రోపుదు రింద్రునకైనను; \| శాపానుగ్రహము లా సుచరితుల లీలల్‌.	142
క.	ద్రవిడ కళిం గాశీనర \| యవన శక పుళింద నృపతు లవని సురపరా భవమునఁ గాదే, ధరణీ \| ధవ! పొందిరి తొల్లి శూద్రతా దైన్యంబున్‌.	143
క.	సోమాత్మకు లీశ్వరతా \| శ్రీమహితులు, సర్వసౌఖ్య సిద్ధి కరులు, గో త్రామరులు, వారి నెప్పుడు \| భూమీశ్వర! పూజనములఁ బోషింపు తగన్‌.	144
క.	వినుతాచారుం డగు వి \| ప్రునకు, సభక్తికము గాఁగ, భోజన మిడినన్‌ విను, దేవపితృ సమూహము \| లనూనపరితృప్తిఁ బొందు నతులచరిత్రా!’	145