శ్రీమహాభారతము - ఆనుశాసనికపర్వము - పంచమాశ్వాసము - భీష్ముఁడు ధర్మజునకు విష్ణునామ ప్రభావంబుఁ దెలుపుట - కవిత్రయ భారతము - కవిత్రయము - నన్నయ - తిక్కన - ఎఱ్ఱన - ఆంధ్రమహాభారతము

భీష్ముఁడు ధర్మజునకు విష్ణునామ ప్రభావంబుఁ దెలుపుట (సం. 13-135-121)

సీ.	విష్ణునామంబులు వేయును నిత్యంబు \| వినినఁ బఠించిన మనుజుఁ డిహము నందుఁ బరమ్మున నశుభంబు నొందక \| యత్యంత శుభముల ననుభవించు; విప్రుండు వేదాంతవిదుఁ డగు, రాజు వి \| జయ మొందు, వైశ్యుఁ డక్షయ ధనంబుఁ బడయు, శూద్రుఁడు సుఖభాగిత వెలయు, ధ \| ర్మార్థకామ ప్రజాభ్యర్థి జనులు
తే.	గాంతు రయ్యై తెఱంగు; లేకాంత భక్తి \| శౌచియై విని కీర్తించి సారయశము నచల లక్ష్మియు వంశ వర్యతయు మేలి \| పెంపుసొంపును గలిగి శోభిల్లు నరుఁడు.	326
సీ.	పురుషోత్తముని నామములు వేయుఁ గీర్తించు \| నాతఁ డొక్కెడను భయంబుఁ బొందఁ, డమిత వీర్యమునఁ దేజమునఁ గాంతిని బల \| రూపగుణంబుల రూఢికెక్కు , రోగబంధాపదార్తులకుఁ బఠనమాత్ర \| నయ్యయి దురితము లడఁగు, వాసు దేవాశ్రయుఁడు వాసుదేవ పరాయణుఁ \| డును నగుమర్త్యుఁ డవ్వినుతనామ
ఆ.	కము లుపన్యసించి కల్మషంబుల నెల్ల \| దొఱఁగి దుర్గతులకుఁ దొలఁగి జన్మ మరణములకు రోగ జరలకు నందని \| పరమమైన బ్రహ్మపదము నొందు.	327
క.	స్మృతి సౌఖ్య క్షాంతి శ్రీ \| ధృతి కీర్తులు గలుగు దుర్మతియుఁ గ్రోధము లు బ్ధతయును మాత్సర్యము లే \| వతి పుణ్యత విష్ణుభక్తులైన జనులకున్‌.	328
సీ.	చంద్రార్క నక్షత్ర సహిత మైన నభంబు, \| సచరాచరోర్వియు, జలనిధులును, సురదైత్య గంధర్వ గరుడ యక్షోరగ \| వ్రజములు హరివశవర్తనములు; బుద్ధియు నింద్రియములును మనంబు స \| త్త్వంబును బలము దేజంబు ధృతియు క్షేత్రంబుఁ దద్గత క్షేత్రజ వస్తువు \| లరయఁగా వాసుదేవాత్మకంబు;
తే.	లాగమోదితాచారమయంబు ధర్మ; \| మచ్యుతుండు తత్ప్రభువు; సాంఖ్యమును యోగ తంత్రమును శిల్పవేదశాస్త్రములుఁ గర్మ \| ములు జనార్దనువలన సముద్భవించె.	329
ఆ.	విష్ణుఁ డొక్కరుండ విను మహాభూతంబు; \| దక్కు భూత తతులు పెక్కు గలవు; సరిఁ ద్రిలోకములను బరఁగి విశ్వంబు భూ \| తాత్ముఁ డమ్మహాత్ముఁ డనుభవించు.	330
ఆ.	వ్యాస సంప్రణీతమైన యీ విష్ణు స్త \| వంబు సకలశోభనంబులును సు ఖములుఁ గోరు పురుషుఁ డమలినబుద్ధిఁ బ \| ఠింపవలయు భక్తి పెంపుతోడ.	331
క.	అజు విశ్వాధీశ్వరు స \| ర్వజగత్ప్రభవావ్యయ ప్రవర్తనకరు నం బుజలోచను నెవ్వారలు \| భజింతురు పరాభవమునఁ బడ రప్పుణ్యుల్‌.	332
క.	కావున విష్ణుని పేళ్ళగు \| నీ వేయుఁ బఠింపు నీకు నెప్పుడు నాయు శ్శ్రీవిభవారోగ్యంబులు \| భూవర! సిద్ధించుఁ బరమబోధముఁ గలుగున్‌.’	333
క.	అని యిట్లుపదేశించిన \| విని మోదము నెమ్మనమున వెల్లిగొనఁగ బాం డుని యగ్రసుతుఁడు గాంగే \| యున కభివందన మొనర్చి యుచితవినయుఁ డై.	334
వ.	‘పూజానమస్కారంబులకు నెవ్వరు భాజనంబు? లెవ్వరికిఁ జెట్ట సేసినం జేటు వాటిల్లు? నెవ్వారలు సంతోషించిన శుభంబులు చొప్పడుం? జెప్పవే’ యనిన నతం డతని కిట్లనియె.	335