ఆంధ్రభారతి - శతకములు - కుమార శతకము

క.	ఘన బీజము సాయము లే కను భూములు నిష్ప్రయోజకంబైన విధం బున దైవము తోడిలఁగా కనె పౌరుష కర్మఫలము గలదె కుమారా?	81
క.	ధరనే వస్తువులైనన్‌ దరుగుటకై వృద్ధినొందుఁ దగఁ బొడ వెదుగున్‌ విరుగుటకై, పాయుటకై దరిఁ జేరును, వీని మదిని దలఁపు కుమార!	82
క.	జనియించుట పొలియుటకే పెను సుఖమొందు టది కష్ట విధి నొందుటకే విను హెచ్చుట తగ్గుటకే యని మనమున నమ్మవలయు నయ్య! కుమారా!	83
క.	ఎటువంటి వరకులంబునఁ బటుతరముగఁ బుట్టెనేని పరఁగఁగ మును గ న్నటువంటి కర్మఫలములఁ గటగట! భోగింపవలయుఁ గాదె? కుమారా!	84
క.	పెక్కుజనులు నిద్రింపఁగ నొక్కండయ్యెడను నిద్ర నొందకయున్నన్‌ గ్రక్కున నుపద్రవం బగు నక్కర్మమునందుఁ జొరకు మయ్య! కుమారా!	85
క.	మధురంబులఁ గొననొల్లఁడు బుధజనుఁ డేకతమ దారిఁ బోనొల్లఁడు నీ విధ మెఱిఁగి నీవును మనో రథ సిద్ధుఁడవగుచు మెలఁగ రాదె! కుమారా!	86
క.	ధనవంతుఁడె కులవంతుఁడు ధనవంతుఁడె సుందరుండు, ధనవంతుండే ఘనవంతుఁడు బలవంతుఁడు ధనవంతుఁడె ధీరుఁడనుచుఁ దలఁపు కుమారా!	87
క.	విను ప్రాణరక్షణమునన్‌ ధనమంతయు మునిగిఁపోవు తఱిఁ బరిణయమం దున గురుకార్యమున వధూ జన సంఘములందు బొంకఁ జనును గుమారా!	88
క.	కులభామల విడువకు, వెలి పొలఁతుల వీక్షించి మోహమునఁ బొరలకుమీ ఖలుఁ డందు రెట్టివారలుఁ గులహీనుఁడు పుట్టెననుట కొఱలుఁ గుమారా!	89
క.	చపలాత్ముఁ డవనిలోపల నపాత్ర జనులకును దాన మందిచ్చుట హి నపుఁ గుక్క నోటిలోపల నిపుణత నెయిపోసినట్లు నెగడుఁ గుమారా!	90